Կաթողիկոսի դեմ ստորագրահավաք նախաձեռնողը Կճոյանի աշխատակիցն է. «Ժողովուրդ»

«Ժողովուրդ»-ը գրում է. «Հայտնել էինք, որ հայրենի իշխանությունները կաթողիկոսին հեռացնելու համար նոր էլեկտրոնային էջ են ստեղծել: Barenorogum.am կայքով առաջարկում են էլեկտրոնային քվեարկությամբ հավանության տալ Կաթողիկոսի հեռացման եւ եկեղեցու բարենորոգման խնդրին:
Նկատեցինք, որ կայքի պատասխանատուն Ալմաստ Մուրադյանն է, որը ղեկավարն է Արարատյան Հայրապետական թեմի աշխատակազմի։ Մուրադյանը նաև «Դիալոգ» հասարակական կազմակերպության նախագահն է։ ՀԿ-ն Կրոնի և Հանրային կապերի ուսումնավերլուծական կենտրոն է։

Ուսումնասիրությունները ցույց տվեցին, որ այդ կայքում գրվածը ուղիղ համեմատական է Նիկոլ Փաշինյանի հայտարարություններին։

Կայքում հերթով հրապարակված են նաև եպիսկոպոսների հայտարարությունները։

Կապվեցինք Ալմաստ Մուրադյանի հետ. մի քանի հարց տալով՝ փորձել ենք նրանից պարզել մեզ հետաքրքրող հարցերի պատասխանը։
Փորձեցինք հասկանալ, թե ում առաջարկով է ստեղծվել Վեհափառի դեմ ստորագրահավաքի կայքը, ովքեր են կայքը ղեկավարողները, ինչ նպատակ այն ունի։

«Կայքում գրված է եպիսկոպոսաց դասի հայտարարություն։ Այսինքն՝ դա արդեն ենթադրում է, որ եպիսկոպոսները, որոնք տարածել են հայտարարությունը, իրենք էլ կայքի նախաձեռնողն են։

Կայքում այլ բան ներկայացված չէ։ Կայքի նպատակը եղել է, որ 10 եպիսկոպոսները, այս պահին ովքեր այստեղ են գտնվում, իրենց հայտարարությունն են ներկայացրել, ինչպես կայքում գրված է։
Սա կոչ է նվիրապետական աթոռների գահակալներին, եպիսկոպոսներին, վարդապետների և քահանա հայրերին։ Կայքի նախաձեռնությունը ծնվել է հենց այս հայտարարությունից, որի հետ Նիկոլ Փաշինյանը կապ չունի»,- ասում է Մուրադյանը։

Փաշինյանի հետ կապ չունի, սակայն հարկ է նշել, որ 10 եպիսկոպոսների հայտարարությունը հենց ներքին ճնշումների արդյունք է եղել։ Այս մասին մամուլում բազմաթիվ են անդրադարձները։

Մուրադյանը վստահեցրեց, որ այս գործին լծվել է որպես անհատ, և այն հանգամանքը, որ նա ՀԿ նախագահ է և Արարատյան Հայրապետական թեմի աշխատակազմի ղեկավարը, որևէ առնչություն չունեն դրա հետ. ինքը որպես անհատ է զբաղվում կայքի աշխատանքներով»:

Մանրամասները՝ թերթի համարում: