«Հազարավոր ընտրողներին հիասթափեցնում են՝ մղելով չգնալ ընտրությունների». Նաիրի Հոխիկյան

Լրագրող, հանրային գործիչ Նաիրի Հոխիկյանի գրառումը․ «Ինչքան մոտենում է ընտրությունների օրը, այնքան ավելի շատ են դառնում խոսակցությունները, թե այդկերպ հնարավոր չէ հաղթել Նիկոլին և պետք է այլ տարբերակներով հարցը լուծել։
Որպես կանոն՝ այլ տարբերակ առաջարկող մարդիկ ուժն են մատնանշում, բայց իրենք անպայման քաշվում են հետ, թե այդ ուժը պետք է կիրառեն քաղաքական գործիչները։
Նախ, բռնությունը անթույլատրելի գործիք է Հայաստանի նման երկրում, քանի որ դա հանգեցնելու է աղետաբեր հետևանքների, բացի այդ, այսօր բռնությունը ձեռնտու է միայն Նիկոլ Փաշինյանի կառավարությանը։ Միայն նա կարող է հանգիստ ձեռք բարձրացնել հայերի վրա ու հոգին փառավորել, եթե լինեն զոհեր ու վիրավորներ։ 2008-ի մարտի 1-ը հիշեք։
Այն մարդիկ, որոնք այսօր խոսում են ընտրությունների անիմաստ լինելու մասին, կամա թե ակամա օգնում են Նիկոլին երկու բանով.
1. Նիկոլի ձեռքը զենք են տալիս ընդդիմադիր գործիչներին մեղադրելու, բռնություն ծրագրելու և հետևաբար նոր կալանավորումների համար։
2. Հազարավոր ընտրողներին հիասթափեցնում են՝ մղելով չգնալ ընտրությունների։ Եթե անիմաստ է, ինչո՞ւ գնալ։
Իրականում Հայաստանում հնարավոր է Նիկոլին փոխել ընտրության միջոցով, եթե ընդդիմությունը կարողանա տարբեր ուղղություններով ճիշտ կազմակերպել իր պայքարը։
Ես հավատում եմ, որ կկարողանա։ Ես տեսնում եմ այդ հնարավորությունը, կամքը և կարողությունը։
Հետևաբար, պետք է գնալ ընտրության հաղթելու համար»։