«Ո՞վ կմտածեր, որ ՆԱՏՕ-ի ու ԵՄ-ի գլխավոր խնդիրը կլինի ԱՄՆ-ն, այլ ոչ թե ՌԴ-ն»․ Արշալույս Մղդեսյան

Լրագրող Արշալույս Մղդեսյանը ֆեյսբուքյան իր էջում գրում է․ «Թրամփը վերջնագրային տոնով պահանջում է գնել Գրենլանդիան։ Ի պատասխան նրա մաքսատուրքային սպառնալիքների՝ Եվրամիությունը կարող է գործի դնել առևտրային «ծանր հրետանին»։
Թե կոնկրետ ինչ գործիքակազմ է դա, պարզ չէ, քանի որ այն երբեք չի կիրառվել։ Հայտնի է միայն, որ այն մշակվել էր Չինաստանի դեմ հնարավոր առևտրային պատերազմի համար, սակայն գլոբալ մրցակից Պեկինի փոխարեն թիրախում կարող է հայտնվել դաշնակից Վաշինգթոնը։
Դրան զուգահեռ՝ Ռուսաստանի նախագահը հրավիրվել է Թրամփի նախաձեռնած՝ Գազայի հարցով խաղաղության խորհուրդ։ Աշխարհաքաղաքական ֆանտաստիկա է թվում, բայց արդեն իրողություն է։
Ռեսուրսների համար պայքարին ստորադասվում են դաշինքները, ՆԱՏՕ-ն, ինչպես նաև Երկրորդ աշխարհամարտից հետո ձևավորված աշխարհակարգի հիմնարար սկզբունքները՝ ինքնիշխանությունն ու տարածքային ամբողջականությունը։
Ո՞վ կմտածեր, որ ՆԱՏՕ-ի ու Եվրամիության գլխավոր խնդիրը կլինի ԱՄՆ-ն, այլ ոչ թե Ռուսաստանը»։