Երեքշաբթի, 20 հունվարի, 2026 թ.
|
Ստեփանակերտում`   -4 °C

«Այս նախագիծը մեռելածին է և հակաեկեղեցական արշավի մաս կազմելու հայտ է»․ Լիլիթ Գալստյան

«Այս նախագիծը մեռելածին է և հակաեկեղեցական արշավի մաս կազմելու հայտ է»․ Լիլիթ Գալստյան
137
Այսօր, 18:24

ԱԺ «Հայաստան» խմբակցության պատգամավոր Լիլիթ Գալստյանը ԱԺ հայտարարությունների ժամին անդրադարձավ այսօր ԱԺ-ում առաջին ընթերցմամբ ընդունված «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքում փոփոխություն կատարելու մասին նախագծին՝ ընդգծելով, որ այն չի համապատասխանում օրինաստեղծ գործունեության տարրական պահանջներին:

«Ի սկզբանե այն մեռելածին է և հետապնդում է սոսկ քաղաքական-քարոզչական նպատակ՝ հետևյալ հիմնավորումներով.

1. Մասնավորապես, պատմության և մշակույթի անշարժ հուշարձանների նպատակային նշանակությունը որևէ մեկն իրավասու չէ փոփոխել՝ անկախ վերջինիս սեփականության ձևից, ուստի օտարվելու դեպքում, շարունակելու է պահպանվել նույն իրավական ռեժիմը: Հետևաբար, անիմաստ է և կեղծ այն մտահոգությունը, որ պատմության և մշակույթի անշարժ հուշարձանները կարող են օտարումից հետո օգտագործվել «ոչ հանրօգուտ և իր բուն նշանակությունից տարբերվող նպատակով»:

2. Հայաստանյայց Առաքելական Սուրբ Եկեղեցին երբևէ չի օտարել և չի էլ պատրաստվում օտարել պատմության և մշակույթի որևէ անշարժ հուշարձան, ուստի օրինագիծը հիմաստազուրկ է նաև այս առումով: Ցանկացած օրենքի նախագիծը պետք է հետապնդի ոչ թե ապրիորի, ենթադրյալ կամ դավադրապաշտական թեզեր, այլ կոնկրետ հանրային պատվեր:

Օրինագծի վերաբերյալ այս ամբիոնից հնչած բազմաթիվ դատողությունները և, այսպես կոչված, հիմանվորումները կամ դիտավորությամբ խեղված են կամ չունեն նվազագույն գիտելիքային հենք: Դրանց բուն ուղղվածությունը ԱԺ ամբիոնից Հայաստանյայց Առաքելական Եկեղեցին վարկաբեկելն է, հանրության մոտ հակաեկեղեցական տրամադրություններ ձևավորել»,- նշեց պատգամավորը՝ հավելելով, որ մասունքների ընծայաբերումը միջեկեղեցական դարավոր ավանդույթ է:

Գալստյանը նաև ընդգծեց, որ այս նախագիծն իրականում սովորական հայտ է՝ հակաեկեղեցական արշավի մաս կազմելու: