«Փնտրում ենք Խաչատուր Սուքիասյանից չվախեցող թարգմանիչների և նոտարների»․ Նաիրի Հոխիկյան

Լրագրող, հանրային գործիչ Նաիրի Հոխիկյանի գրառումը. «Խաչատուր Սուքիասյանի հետ իմ դատական պայքարի շրջանակում ևս մեկ անտրամաբանական իրողության ենք հանդիպում։
Ամերիկյան լրատվական գործակալության հոդվածը դատարան ներկայացնելու համար այն հայերեն թարգմանելուց և թարգմանությունը նոտարական հաստատումից հրաժարվում են ինչպես նոտարները, այնպես էլ լիցենզավորված թարգմանչական ծառայությունները։ Մեկ տասնյակից ավելի թարգմանիչների ու նոտարների եմ դիմել։ Սկզբում ստանձնում են թարգմանությունը, բայց հենց կարդում են Խաչատուր Սուքիասյանի կամ Նիկոլ Փաշինյանի անունը, նրանց գործած առերևույթ հանցանքների մասին տեղեկություններ՝ միանգամից հրաժարվում են։
Հարցնում եմ՝ ի՞նչն է խնդիրը։ Չեն կարողանում տրամաբանական բացատրություն տալ, տարբեր բաներ են ասում՝ թաքցնելով, որ վախենում են։
Հետևաբար ի՞նչ արդարադատության կամ ժողովրդավարության մասին կարող է խոսք լինել, եթե լիցենզավորված թարգմանիչներից շատերը վախենում են թարգմանել ամերիկյան լրատվամիջոցի հոդվածը, և նույնիսկ նոտարներն են վախենում իրենց կնիքը դնել թարգմանվող օրինական փաստաթղթի տակ միայն այն բանի համար, որ դա գործող իշխանության դեմ է։
Մի խոսքով, շարունակում ենք Հայաստանում փնտրել Խաչատուր Սուքիասյանից չվախեցող թարգմանիչների և նոտարների, հակառակ դեպքում Հայաստանից դուրս՝ Սփյուռքի մեր հայրենակիցները միշտ պատրաստ են օգնել լիցենզավորված թարգմանության գործում»։