«Ինչո՞ւ է Անկարան հանկարծ «մտահոգվել» Թեհրանի անվտանգությամբ». Տիգրան Խզմալյան

Եվրոպական կուսակցության ղեկավար Տիգրան Խզմալյանի ֆեյսբուքյան գրառումը․ «ԱՄՆ-Իրան հերթական սրվող հակամարտությամ մեջ անսպասելիորեն միջամտեց Թուրքիան։ Էրդողանն առաջարկեց իրեն Թրամփի և Խամենեիի բանակցությունների «խաղաղարարի» դերում։ Ինչո՞ւ է Անկարան հանկարծ «մտահոգվել» Թեհրանի անվտանգությամբ։ Պատճառը պարզ է՝ Թուրքիան վախենում է կորցնել տարածաշրջանում Արևմուտքի հիմնական «գործավարի» իր ավանդական կարգավիճակը, ինչն անխուսափելի է, եթե ԱՄՆ միջամտությամբ Իրանն իսլամական կրոնապետությունից վերածվի Արևմուտքի գործընկեր և դաշնակից, ինչպես եղել 1979թ. առաջ շահ Փահլավիի օրոք։ Աշխարհիկ ու արևմտամետ Իրանը Թուրքիայի մղձավանջն է։ Ահա ինչու Էրդողանը շտապում է կանխել ԱՄՆ-ի հարվածը Թեհրանի մոլլաների բռնապետությանը, պահպանելու համար թրքական «մենաշնորհը» տարածաշրջանում։ Սակայն այս խաղում կա ևս մի կարևոր մասնակից՝ Իսրայելը։ Վարչապետ Նեթանյահուն շատ բացասաբար է վերաբերվում Էրդողանի թուրանական նկրտումներին և իր հերթին համոզում է Թրամփին՝ խաղադրույք կատարել Իրանում հասունացող իշխանափոխությանը։

Այս բարդ իրավիճակում ՀՀ-ն չի կարողանում չեզոք մնալ և դժբախտաբար, Փաշինյանի ներկայիս կողմնորոշումն ավելի մոտ է Թուրքիայի, Ռսաստանի և Ազռբաժանի դիրքորոշմանը, որոնք ձգտում են պահպանել status quo, որն անչափ անբարենպաստ է Հայաստանի գերագույն շահերին։ ՀԵՎԿ համոզմամբ, դրանք են՝ ԵՄ անդամ եվրոպական երկիր դառնալը, ազատագրված ու ժողովրդավար Իրանի հարևանությամբ»։