Նախկին դատախազը հոգեբանորեն խիստ ընկճված է եղել. մանրամասներ՝ ողբերգական դեպքից

«Արմլուր»-ին ինքնասպան եղած նախկին դատախազ Տիգրան Սուքիասյանի ողբերգական դեպքից մանրամասներ են հայտնի դարձել։ Մասնավորապես նախկին դատախազ Տիգրան Սուքիասյանի մտերիմները պատմել են, որ նա հոգեբանորեն խիստ ընկճված վիճակում է եղել, քանի որ ազատել էին իր հարազատ դատախազական համակարգից:

Նա դատախազի պաշտոնից ազատվել էր 2024 թվականին։ Հայաստանի Հանրապետության գլխավոր դատախազ Աննա Վարդապետյանի՝ 2023 թվականի դեկտեմբերի և 2024 թվականի հունվարի հրամաններով՝ Դատախազությունում տեղի էին ունեցել կադրային մի շարք փոփոխություններ: Արդյունքում, Սյունիքի կայազորի զինվորական դատախազության դատախազ Տիգրան Սուքիասյանն ազատվել էր զբաղեցրած պաշտոնից: Սուքիասյանը չէր վիճարկել այն դատարանում՝ չցանկանալով որևէ կերպ վնասել դատախազական համակարգը՝ հույսով, որ մի օր վերադառնալու է և դեռ հնարավորություն կունենա իր ջանքերը ներդնելու իրավակարգի ամրապնդման և պետությանն անշահախնդիր ծառայելու պատվաբեր գործում:

Ըստ նրա մտերիմների՝ Տիգրան Սուքիասյանը կարմիր դիպլոմով ավարտել էր Երևանի պետական համալսարանի իրավագիտության ֆակուլտետը, արդարամիտ, սկզբունքային և մարդասեր անձնավորություն էր, որևէ մեկի հետ անձնական խնդիրներ կամ վնասակար սովորություններ չի ունեցել, ուներ գեղեցիկ ընտանիք, մանկահասակ դուստր:

Ըստ հարազատների՝ Սուքիասյանն այդպես էլ չի համակերպվել և հաշտ չի եղել իր նկատմամբ կատարված անարդարության հետ և մշտապես հույս է ունեցել, որ կվերադառնա համակարգ, սակայն նրա մարմինը փետրվարի 22-ին գտան Հրազդանի կիրճում:

Մանրամասները՝ տեսանյութում: