«Փաշինյանի համար ամեն ծառի տակ մի ոստիկան է կանգնում՝ մեն-մենակ, կուչ եկած»․ Լիա Սարգսյան

Լրագրող Լիա Սարգսյանը ֆեյսբուքյան իր էջում տեսանյութ է հրապարակել՝ կից գրառմամբ․ «Սուտն ու իրականությունը․ ամեն ծառի տակ մի ոստիկան է կանգնած՝ մեն-մենակ, անձրևի տակ կուչ եկած։
Փաշինյանի համար ամեն ծառի տակ մի ոստիկան էր կանգնած՝ մեն-մենակ, անձրևի տակ կուչ եկած Իր գերթանկարժեք կյանքն ու ճոխ կենսակերպը արդարացնելու համար Նիկոլ Փաշինյանն ասում էր, թե նախկին նախագահներ Ռոբերտ Քոչարյանի և Սերժ Սարգսյանի օրոք, երբ նրանք մարզից մարզ էին մեկնում, «ամեն ծառի տակ մի ոստիկան էր կանգնած՝ մեն-մենակ, անձրևի տակ կուչ եկած»։
Փաշինյանը պնդում էր, թե իր իշխանության օրոք նման պատկեր այլևս չկա, և նույն ոստիկանները ոչ թե ծառերի տակ են կանգնում, այլ նստում են «նոփ նոր, ժողովրդական լեզվով ասած՝ «յուղը վրեն» ավտոմեքենաների մեջ։ Սակայն իրականությունը բոլորովին այլ է։ Նիկոլ Փաշինյանը, մեղմ ասած՝ ստում է։ Ամեն անգամ, երբ նա որևէ մարզ է մեկնում, ճանապարհը բառացիորեն վերածվում է ոստիկանական պատի։
Ամեն խաչմերուկում, ամեն ծառի տակ, ամեն ցանկապատի կողքին տեղակայված են ոստիկաններ։ Եվ խոսքը ոչ թե ավտոմեքենաների մեջ ծառայություն իրականացնողների, այլ ցուրտ ձմռանը, ժամերով, բաց տարածքներում կանգնած ոստիկանների մասին է։ «Իշխանություն» լրատվականը ներկայացնում է թարմ և խոսուն օրինակ։ Կիրակի օրը Նիկոլ Փաշինյանը Արմավիրի մարզի Մրգաշատ համայնքի Սուրբ Աստվածածին եկեղեցում մասնակցում էր պատարագի։ Երևանից մինչև Մրգաշատ ամբողջ ճանապարհին տեղակայված էին ոստիկանական ուժեր՝ ձմռան ցրտին, բաց տարածքներում, առանց որևէ «նոփ նոր ավտոմեքենայի» հարմարավետության։ Ճիշտ այնպես, ինչպես ինքն էր տարիներ առաջ նկարագրում՝ ծառերի տակ կուչ եկած»։