Իրանի նախագահը Գերագույն պաշտպանության խորհրդի նոր քարտուղար է նշանակել

Իրանի նախագահ Մասուդ Փեզեշքիանը հրամանագիր է ստորագրել Ալի Շամխանիին Գերագույն պաշտպանության խորհրդի քարտուղար նշանակելու մասին, գրում է Iran International-ը։

Շամխանին նախկինում եղել է Գերագույն առաջնորդի ներկայացուցիչը Պաշտպանության խորհրդում։ Նախկինում նա եղել է Իրանի պաշտպանության նախարար, Ազգային անվտանգության խորհրդի քարտուղար և Ռազմածովային ուժերի գլխավոր հրամանատար։

Գերագույն պաշտպանության խորհուրդը ստեղծվել է Ազգային անվտանգության խորհրդի կազմում՝ ռազմական որոշումները կենտրոնացնելու և ճգնաժամերին, այդ թվում՝ ռազմական գործողություններին և Իսրայելի հետ հունիսյան պատերազմից հետո ղեկավարության հնարավոր փոփոխությանը նախապատրաստվելու համար։

Ազգային անվտանգության խորհրդի քարտուղարության կողմից 2025 թվականի օգոստոսին հրապարակված տեղեկատվության համաձայն՝ խորհրդի հիմնական խնդիրն է ապահովել պատերազմական կամ ազգային արտակարգ իրավիճակներում պաշտպանական որոշումներ արագ և կենտրոնացված կերպով կայացնելու կարողությունը։