Թմրանյութ և տեսախաղեր. ինչպես է Բաշար ալ-Ասադն անցկացրել իր վերջին օրերը տապալումից առաջ

Իր կառավարման վերջին տարիներին Բաշար ալ-Ասադը հեռացել է Սիրիայի կառավարումից և իր ժամանակի մեծ մասն անցկացրել է հեռախոսով տեսախաղեր խաղալով։ Այս մասին հաղորդել է The Atlantic-ը՝ հղում անելով նախկին անվտանգության աշխատակիցներին և նրա մերձավոր շրջապատի անդամներին։ Նրանք պնդում են, որ նախկին նախագահը անտեսել է ռեժիմը փրկել ձգտող օտարերկրյա առաջնորդների զանգերը և ապավինել է ոչ պրոֆեսիոնալ խորհրդատուների։ Հրատարակությունը նաև պնդում է, որ նա անձամբ հարստացել է թմրանյութերի ապօրինի շրջանառության միջոցով։

2024 թվականի վերջին Ասադը փախել է երկրից և ապաստան ստացել Ռուսաստանում։

«Տարածաշրջանի ոչ մի երկիր չէր ցանկանում, որ Ասադը տապալվի, և մի քանիսը նրան փրկարար օղակ առաջարկեցին։ Եթե նա վերցներ այն, գրեթե անկասկած հիմա նստած կլիներ պալատում», - գրում է աղբյուրը։

Ինչպես նշում է The Atlantic-ը, տարածաշրջանում իրավիճակը վատթարացավ 2023 թվականին պաղեստինա-իսրայելական հակամարտության սկսվելուց հետո, բայց Ասադը անտեղյակ մնաց աշխարհաքաղաքական իրավիճակից և գործնականում հեռացավ կառավարության որոշումների կայացումից։

«Ասադն իր ժամանակի մեծ մասն անցկացնում էր իր հեռախոսով Candy Crush և այլ տեսախաղեր խաղալով», - The Atlantic-ը մեջբերում է Սիրիայի նախկին առաջնորդի մերձավոր շրջապատի անդամներից մեկի խոսքերը։

Ըստ ամսագրի աղբյուրների՝ Սիրիայի նախկին նախագահը ազատել է իր հորը օգնած փորձառու խորհրդականներին և ապավինել է երիտասարդ կողմնակիցներին, որոնք հաճախ կասկածելի փորձ և կարողություններ ունեին։ Օրինակ՝ որպես բացասական ազդեցության օրինակ, Atlantic-ի աղբյուրները մեջբերում են «Ալ Ջազիրա»-ի նախկին լրագրող Լունա ալ-Շիբլին, որը, ենթադրաբար, «Ասադի սիրուհին էր» և որի ազդեցության տակ նա իր ռեժիմի համար վնասակար որոշումներ էր կայացնում։

Հրատարակությունը նաև նշում է, որ հսկայական գնաճի և աճող աղքատության պայմաններում, Ասադը, իրավիճակի վրա ինչ-որ կերպ ազդելու փորձի փոխարեն, ամբողջությամբ կենտրոնացել է անձնական հարստացման վրա՝ Մերձավոր Արևելքում հաճախ հանդիպող «Կապտագոն» թմրանյութի անօրինական արտադրության միջոցով: Ըստ «The Atlantic»-ի՝ սիրիական «Կապտագոն»-ի արտադրությունն ու մաքսանենգությունը վերահսկել է նախկին նախագահի եղբայրը՝ Մահեր ալ-Ասադը։

Աղբյուրները հրատարակությանը հայտնել են, որ Ասադը մինչև վերջ համոզել է իր շրջապատին, որ երկրի հարավից զինված ուժերը կպաշտպանեն մայրաքաղաքը ապստամբների առաջխաղացումից, չնայած այն հանգամանքին, որ դա անհնար էր։