«Մակրոնը Ֆրանսիայի միակ նախագահն է, որ պետական այց չի կատարել Հայաստան»․ Հակոբ Բադալյան

Ֆրանսիայում Հայաստանի Պատվո հյուպատոսը հայտարարել է, որ նախագահ Մակրոնը մայիսի 4-ին կժամանի Հայաստան՝ երկօրյա այցով: Նա հանդիպում կունենա Նիկոլ Փաշինյանի հետ և կմասնակցի Եվրոպական քաղաքական համայնք նախաձեռնության գագաթնաժողովին:
Այս թեմային անդրադարձել էի թելեգրամյան ալիքում, առաջարկում եմ ծանոթանալ, իրազեկվելու համար, թե Հայաստանի առնչությամբ ինչով է Մակրոնը առանձնանում Ֆրանսիայի նախորդ նախագահներից․ «․․․Դատելով այն հանգամանքից, որ այցը երկօրյա է, պետք է եզրակացնել, որ այն այդուհանդերձ կլինի աշխատանքային, իսկ առավելագույնը՝ պաշտոնական:

Հիշեցնեմ, որ Մակրոնը առայժմ Ֆրանսիայի միակ նախագահն է, որ Հայաստանի անկախությունից ի վեր պետական այց չի կատարել Հայաստան: Մակրոնը պաշտոնը զբաղեցնում է 2017 թվականից: Նրանից առաջ նախագահներ Շիրակը, Սարկոզին և Օլանդը իրենց նախագահության ընթացքում պետական այցով եղել են Հայաստանում: Պետական այցը օտարերկրյա պետությունների ղեկավարների այցերի բարձրագույն մակարդակն է, որի ընթացքում քաղաքական բովանդակությանը տրվում է առանձնահատուկ նշանակություն:

Իհարկե Հայաստանի անկախության շրջանում եղել է նաև նախագահ Միտերանը, բայց նա հրաժեշտ է տվել իր պաշտոնին 1995 թվականին, այսինքն Հայաստանի անկախանալուց չորս տարի անց, որից երեք տարիներին եղել է արցախյան առաջին պատերազմը և պարզ է, որ այդ ընթացքում Միտերանը չէր ժամանի ռեգիոն»»: