«Եթե սա նախընտրական տեխնոլոգիա չէ, ապա սխալ է Աննա Հակոբյանի՝ պետական պահպանությունից դուրս լինելը»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Դիտում եմ Աննա Հակոբյանի տարածած տեսանյութը, թե իր և Նիկոլ Փաշինյանի քաղաքացիական ամուսնությունն ավարտված է և հեռանում է կառավարական առանձնատանից ու ապրելու է վարձով բնակարանում, չի ունենալու պետական պահպանություն:
Ուզում եմ անդրադառնալ հենց այս դրվագին: Եթե այս պատմությունն ընդհանրապես նախընտրական ինչ որ տեխնոլոգիա չէ, ապա կարծում եմ սխալ է, եթե Աննա Հակոբյանը լինելու է, այսպես ասած, պետական պահպանությունից դուրս: Անկախ նրա հանդեպ որևէ մեկի վերաբերմունքից, սա մասնավոր հարց չէ, անձնական վերաբերմունքի հարց չէ:
Հակոբյանը եղել է մարդ, որը իր՝ թե անձնական, թե նաև դե ֆակտո պետական կարգավիճակի բերումով կարող է տիրապետել շատ կոնֆիդենցիալ տեղեկատվության: Հետևաբար, եթե նա զուրկ է պետական պահպանության ուշադրությունից, առաջանում է հնարավոր այդ ինֆորմացիայի հանգամանքի ամենատարբեր «ճակատագրերի» հարց:
Կրկնեմ, եթե այս ամենը լոկ նախընտրական տեխնոլոգիա չէ և գործնականում լինելու է դե ֆակտո պահպանություն, որի քողարկումն իհարկե հատուկ ծառայությունների համար բոլորովին բարդ բան չէ:
Այս հարցն ունի իհարկե մեկ այլ «երես», որն ըստ իս ևս շատ կարևոր է: Աննա Հակոբյանն ասում է, թե՝ ինձ մի վիրավորեք, եթե տեսնեք փողոցում մենակ քայլելիս: Հանրությունը շատ բազմազան երևույթ է, շատ բազմաշերտ: Հետևաբար երբեք հնարավոր չէ «կռահել», թե ինչ կարող է լինել փողոցում: Եվ այդ թվում՝ ինչպիսի սադրանք կարող է պատրաստվել, որի նպատակը կլինի ասենք Աննա Հակոբյանին «զոհի կերպարում» ներկայացնելը: Խոսքը իհարկե բառի բուն իմաստով չէ, այլ՝ վիրավորանքի «զոհի», կամ ինչ որ տհաճ միջադեպի, որը հետո կբարդվի ասենք որևէ ընդդիմադիր ուժի վրա: Կարո՞ղ են լինել այդպիսի սցենարներ:
Միանգամայն կարող են: Իսկ քաղաքականության մեջ այդ ո՞ր սցենարն է, որ կարող ենք համարել անհնար, առավել ևս այդ ամենի պարագայում, որ մենք ենք տեսել որպես հանրություն, ինչպես նաև լսել միջազգային մասշտաբի մասին:
Հետևաբար, իմ սուբյեկտիվ կարծիքով, Անննա Հակոբյանը պետք է լինի պահպանության ներքո: Մնացյալը, անձնական կյանքի հարցերը, ես իհարկե բոլորովին չեմ պատրաստվում դիտարկել կամ քննարկել»: