«Իշխանությունը վերընտրվելու հույսով առատ խոստումներ է տալիս»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Տավուշի մարզի սահմանամերձ և Լոռու մարզի որոշ գյուղերի բնակիչներին խոստացել են իրենց տների, դրանց կից շինությունների ծածկերի ասբոշիֆերը փոխել մետաղյա թիթեղներով, քանի որ ասբեստը քաղցկեղ է առաջացնում։ Գյուղացիներն էլ հավատացել են իշխանության խոստմանը։ Տավուշի մարզպետարանից ճշտել եմ, որ տների, շինությունների ծածկի ասբոշիֆերների մակերեսի հաշվառումը կատարվում է տարածքային կառավարման և ենթակառուցվածքների նախարարության հանձնարարականով, շիֆերների փոխարինման կամ փոխհատուցման մասին խոսք չկա։ Դե առջևում ընտրություննր են, բանավոր խոստանում են։
Լեգենդար հրամանատար Չապաևն իր համհարզ Պետկային ուղարկում է մոտակա գյուղ՝ սամագոն օղի բերելու։ Պետկան գալիս է ձեռնունայն։ Նա Չապաևին ասում է՝ գյուղացիներն ասացին՝ սամագոն չունենք։ Չապաևը Պետկային վերցրած այդ գյուղ է գնում։ Մտնում է գյուղացու խրճիթ, բարևում է։ Չապաևն ասում է գյուղացուն․
-Տունդ կիսաքանդ է, սովետական իշխանությունն այն կնորոգի, 5 կով էլ կտա, որ լավ ապրեք։
Գյուղացու ընտանիքն ուրախանում է, ճոխ սեղան բացում, հյուրասիրում, դեռ շտոփով սամագոնն էլ հետները դնում։
-Էխ, Պետկա, խոստանալը դժվա՞ր էր, որ այդ մարդկանց չէիր խոստացել,- նախատում է Չապաևը։
Տաքսիստին փողոցում կանգնեցնում է լրիվ մերկ ջահել կին։ Ճանապարհին տաքսիստն անընդհատ ետ է նայում, հայացքով զննում կնոջը։ Կինն ասում է․
-Կյանքում մերկ կին չե՞ս տեսել։
-Տեսել եմ, ուղղակի չեմ հասկանում, թե ուղեվարձը որտեղի՞ց ես հանելու։
Հայաստանի պետբյուջեն նաև նոր վարկերով է ձևավորվում, իսկ իշխանությունը վերընտրվելու հույսով առատ խոստումներ է տալիս, սակայն ո՞վ, որտեղի՞ց է վճարելու այդ խոստումների իրականացման համար»։