«Հայտարարեք, որ չեք մասնակցում ընտրություններին և միանում եք Սամվել Կարապետյանին»․ Սամվել Ֆարմանյան

ԱԺ նախկին պատգամավոր Սամվել Ֆարմանյանի ֆեյսբուքյան գրառումը․ «ՀՀ 2-րդ նախագահ Ռոբերտ Քոչարյանին.
Հարգելի պարոն նախագա՛հ, սոցհարցումները ևս ապացուցում են՝ դուք ՉԵ՛Ք հաղթահարում 8% ընտրական շեմը: Որքան օրերը առաջ գնան, դա էլ ավելի ցցուն է դառնալու բոլորի, նաև «Հայաստան» դաշինքի համար:
Եթե մասնակցեք, այդ 5-6 % ձայները փոշիանալու են, ինչի արդյունքում Նիկոլն էլի վերարտադրվելու է: Պարզ մաթեմատիկա է: Նախընտրական քարոզչության նրբությունների մասին չեմ էլ խոսում: Ո՞ւմ պիտի մատնացույց անի Նիկոլը՝ էլի վախեցնելու ու խաբելու մեր ժողովրդին:
Դուք ուղղակի պարտավոր եք անել միակ ճիշտ քայլը՝ հայտարարեք, որ չեք մասնակցում ընտրություններին և միանում եք ֆավորիտ ուժին՝ Սամվել Կարապետյանին:
Ձեր նման որոշումը ձնագնդիի էֆեկտ է ունենալու և բերելու է ընդդիմության վերջնական կոնսոլիդացիային: Կասկած չունեմ, որ այդ դեպքում նույնը կանեն այլ ուժեր ևս, որոնք ևս չեն հաղթահարում ընտրական շեմը:
Այդ պարագայում Նիկոլը պարտվելու է ընտրություններում դեռ մինչև հունիսի 7-ի քվեարկությունը: Ոչ մի շանս չի ունենալու: Ոչ մի: Կեղծի ընտրության արդյունքները՝ չի մարսի, կլինի փողոցային էնպիսի պոռթկում, որ 2018թ. ապրիլ-մայիսն այբբենարանի հանդես կթվա:
Արե՛ք պետական այրին վայել քայլ: Արե՛ք, քանի Հայաստանի փրկության շանս կա:
Հակառակ դեպքում անձամբ Ձեզ վրա է մնալու ոչ միայն Նիկոլի հերթական վերարտադրության, այլև եղած ու գալիք աղետների ողջ պատասխանատվությունը:
Ընտրությունը Ձերն է»: