Իրանի մասնակցությունն ԱՄՆ-ի հետ բանակցություններին մնում է անորոշ

Իրանի մասնակցությունն ԱՄՆ-ի հետ բանակցություններին մնում է անորոշ և կախված է Թեհրանի կողմից պայմանների կատարումից, հաղորդում է իրանական «Թասնիմ» լրատվական գործակալությունը։
Գործակալության տվյալներով՝ ԱՄՆ-ի ռազմածովային շրջափակումը բանակցությունների ամենալուրջ խոչընդոտն է, որն Իրանը բարձրաձայնել է պակիստանցի միջնորդի հետ զրույցում։ «Թասնիմը» նաև մատնանշում է ԱՄՆ-ի չափազանցված պահանջները՝ նշելով, որ Թեհրանը Վաշինգթոնից ակնկալում է ավելի իրատեսական մոտեցում։ «Մինչև հիմնական խոչընդոտները չվերացվեն, ընդունելի համաձայնագրի հասնելու հստակ հեռանկար չկա, և Իրանը որևէ հիմք չունի ամերիկյան թատրոնին մասնակցելու համար», - գրել է գործակալությունը՝ նշելով, որ «Իրանի՝ բանակցություններին չմասնակցելու որոշման մեջ որևէ փոփոխություն չի եղել»։
Իրանի արտաքին գործերի նախարարության խոսնակ Իսմայիլ Բաղային երկուշաբթի օրը կայացած ճեպազրույցի ժամանակ հայտարարել է, որ Թեհրանը չունի ԱՄՆ-ի հետ բանակցությունների երկրորդ փուլ անցկացնելու ծրագրեր՝ հավելելով, որ դեռևս որոշում չի կայացվել այն մասին, թե արդյո՞ք բանակցությունները կկայանան։ Միևնույն ժամանակ, ԱՄՆ-ի նախագահ Դոնալդ Թրամփը հայտարարել է, որ ԱՄՆ-ի պատվիրակությունը, այդ թվում՝ ԱՄՆ-ի փոխնախագահ Ջ.Դ. Վենսը, երկուշաբթի երեկոյան կժամանի Իսլամաբադ՝ Իրանի հետ բանակցությունների համար։