52-ամյա չինացին հայրություն է արել 267 երեխայի

Չինաստանում ֆիզկուլտուրայի 52-ամյա ուսուցիչը խնամակալության տակ է առել առնվազն 267 երեխայի: Նա ստացել է «սուպեր հայրիկ» մականունը, գրում է South China Morning Post-ը։

Բայ Ջիանգը ծնվել է գյուղական աղքատ ընտանիքում: Նա կարողացել է քոլեջ հաճախել միայն իր մարզական հմտությունների շնորհիվ: 1995 թվականին ավարտելուց հետո նա աշխատանքի է անցել միջնակարգ դպրոցում և նկատել է մի երեխայի, որը հաճախակի բացակայում էր դասերից և գողանում էր մյուս երեխաներից սնունդ: Ջիանգը պարզել է, որ տղային լքել են ծնողները և նրան վերցրել է իր մոտ:

Ավելի ուշ նա սկսել է խնամել այլ երեխաների՝ որբերի և ծնողների կողմից լքվածների: Ծայրը ծայրին հասցնելու համար նա պարտքով գումար է վերցրել և ազատ ժամանակ աշխատել կես դրույքով: Նա նաև խնդրել է մորը և քրոջը հոգ տանել իր երեխաների մասին, երբ ինքը չի կարողացել:
Իր անձնական փորձից ելնելով՝ Բայ Ջիանգը որոշել է, որ իր բոլոր երեխաները պետք է շատ ժամանակ հատկացնեն մարզվելուն: Ամեն առավոտ նա նրանց արթնացնում է ժամը 4:30-ին՝ վազքի համար: Բայ Ջիանգի բոլոր խնամակալ երեխաները ամեն օր վազում են 12 կմ:

Բայ Ջիանգի տանը մշտապես ապրում է մինչև 30 երեխա։ Նա ամուսնացել է 46 տարեկանում, և նրա առաջնեկը ծնվել է 2020 թվականին։ Կանանցից շատերը, որոնց հետ նա փորձել է հարաբերություններ հաստատել, լքել են նրան՝ մերժելով նրա բարեգործական նախաձեռնությունը։

Ջիանգի խնամատար երեխաներից մի քանիսը մեծանալով՝ դարձել են պրոֆեսիոնալ մարզիկներ, պետական ​​ծառայողներ և ուսուցիչներ։ Նրա որդեգրած երեխաներից ավելի քան 100-ը ստացել են բարձրագույն կրթություն, իսկ 50-ը՝ բարձրագույն մարզական կոչում։ Նրա տանը պահվում են 1300 մեդալներ, որոնք նրա խնամատար երեխաները նվաճել են տարբեր մրցումներում 20 տարվա ընթացքում։