«Էլի մազապուրծ ենք դարձել»․ Նարեկ Գալստյան

Լրագրող, քաղաքագետ Նարեկ Գալստյանը ֆեյսբուքյան էջում տեսանյութ է հրապարակել՝ կից գրելով․ «Անրի Վեռնոյի անզուգական «Մայրիկ» ֆիլմի այս հատվածը, որ տպավորվել էր մանուկ հասակից, մեկ էլ հիշեցի Հակարիի կամրջով արցախահայության գաղթը տեսնելու ժամանակ…
Անհայրենիք… Ինչքան սարսափ կա էս մի բառի մեջ, որ խտացնում է ամեն ինչ՝ կորցրած հող, կորցրած հարազատներ, կորցրած տուն, կորցրած գերեզմաններ, սրբավայրեր, հիշողություն ու ինքնություն: Մազապուրծի հոգեբանություն՝ մատնված հավերժ տարագրության:
Սրանից 30 տարի առաջ մեր պապերն ու հայրերը մեր վրայից մի կողմ նետեցին մազապուրծի խարանը, փոխեցին մեր հոգեբանությունը, պնդեցին, որ էս արևի տակ հային էլ տեղ կա: Ուժ ցույց տվեցին: Էսօր մենք վերադարձել ենք 20-րդ դարի քսանական թվականներ մեր հոգեբանությամբ, էլի մազապուրծ ենք դարձել: 100 տարի հետ ընկանք: Ուղիղ 100 տարի:
Հիշատակն արդարոց վրեժով եղիցի…»։