«ՀՀ «ընտրակաշառակեր» քաղաքացին է մեղավոր երկրի քաղաքական կարկառունների քաղաքական անբավարարության համար». Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը. «ՀՀ «ընտրակաշառակեր» քաղաքացին է մեղավոր ու պատասխանատու երկրի քաղաքական կարկառունների քաղաքական անբավարարության համար: Դե եթե մեր քաղաքացին այդպիսին է, թող չտրտնջա ո՛չ Փաշինյանի՝ վարչապետ մնալու, ոչ էլ այդ կապակցությամբ նեղված ընդդիմության կողմից պատգամավորական քսիվները վերցնելու պատրաստակամության համար: Այս ամենի մեղավորը հայտնի է ու հանրահռչակված՝ դա նույն ինքը՝ ՀՀ հպարտ, բայց ընտրակաշառակեր քաղաքացին է, որը պարտավոր էր մերժել, օրինակ, թոշակների բարձրացումը, կամ հունիսի 7-ին վարչապետ դարձող նոր անձի շռայլած բարիքներն ու խոստումները: Եվ սրա համար այդ մեղսագործ քաղաքացին քաշելիք ունի հաջորդ հինգ տարիների տեսքով: Մինչդեռ իրենից սրտնեղած տղերքը ձեռքները վրան թափ կտան ու կզբաղվեն իրենց բուն գործով»: