«Չեմ ուզում, որ նա դառնա Բայդեն ու ընկնի բեմից»․ Թրամփը կանխել է փոքրիկ տղայի բեմից ընկնելը

ԱՄՆ նախագահ Դոնալդ Թրամփը Լաս Վեգասում ելույթի ժամանակ կանխել է փոքրիկ տղայի բեմից ընկնելը և հերթական անգամ կատակել իր նախորդի՝ Ջո Բայդենի մասին։ Այս մասին հայտնում է Daily Mail-ը։

Թրամփը ելույթ է ունեցել «Red Rock Casino Resort and Spa»-ում՝ քննարկելով տնտեսական քաղաքականությունը։ Միջոցառման ավարտին նա բեմ է հրավիրել ամուսիններ Սանդրային և Բրեդին՝ նրանց երկու փոքր երեխաների հետ։ Երբ խաղատանը մատուցողուհի աշխատող Սանդրան սկսել է պատմել իր աշխատանքի մասին, նրա փոքրիկ որդին շարժվել է դեպի բեմի եզրը։ Թրամփը նկատել է դա և արագ մոտեցել երեխային ու կանգնեցրել նրան։

«Ես չեմ ուզում, որ նա դառնա Բայդեն և ընկնի բեմից», - կատակել է ԱՄՆ առաջնորդը՝ հիշելով 2023 թվականի միջադեպը, երբ Ջո Բայդենը արարողության ժամանակ սայթաքել էր։