«2 միլիարդ 640 միլիոն դրամ կհատկացվի COP17-ի կազմակերպման համար»․ Համբարձում Մաթևոսյան

«2026 թվականի հոկտեմբերին Հայաստանը կհյուրընկալի համաշխարհային բնապահպանական օրակարգի կարևորագույն իրադարձություններից մեկը՝ ՄԱԿ-ի կենսաբազմազանության մասին կոնվենցիայի կողմերի 17-րդ համաժողովը՝ COP17-ը։ Համաժողովին կմասնակցեն կոնվենցիայի անդամ 196 երկրների ներկայացուցիչներ և տասնյակ հազարավոր մասնակիցներ ամբողջ աշխարհից»,- այս մասին Կառավարության նիստի ժամանակ ասաց ՇՄ նախարար Համբարձում Մաթևոսյանը՝ հավելելով, որ COP17-ին կնախորդի նաև առաջնորդների գագաթնաժողովը՝ պետությունների, կառավարությունների և միջազգային կառույցների ղեկավարների բարձր մակարդակի մասնակցությամբ, որի շրջանակում նախատեսվում է ընդունել «Երկրի վրա կյանքի պահպանման համար» խորագրով Երևանի հռչակագիրը։

Նախարարի գնահատմամբ՝ COP17-ն առանձնահատուկ նշանակություն ունի․ «Սա բացառիկ հնարավորություն է՝ ամրապնդելու երկրի դերակատարումը միջազգային բնապահպանական գործընթացներում և աշխարհին ներկայացնելու Հայաստանի բնապահպանական օրակարգն ու հարուստ կենսաբազմազանությունը»։

Մաթևոսյանի խոսքով՝ կազմակերպչական աշխատանքրեն ամբողջությամբ իրականացվում են ըստ ՀՀ-ի և ՄԱԿ-ի միջև կնքված հյուրընկալ երկրի համաձայնագրի․ նախագծով ներկայացված համաձայնագրի ընդհանուր գումարը կազմել է 2 միլիարդ 640 միլիոն դրամ։