«Մյուս հարևանները ռազմաբազա են տրամադրել Իրանի թշնամիներին․ ամենավստահելի հարևանը Հայաստանն է»․ Փույա Հոսսեինի

«Իրանը 15 հարևան ունի, և ամենավստահելի հարևանը միշտ Հայաստանն է եղել, մենք հազարամյա բարեկամներ ենք եղել»,- ասուլիսի ժամանակ ասել է «Իրան-Հայաստան զարգացման հիմնադրամ»-ի հիմնադիր Փույա Հոսսեինին: «Մենք տեսնում ենք, թե հիմա Իրանի շրջապատում ինչ է կատարվում, մեր հարևանների հետ լուրջ խնդիր ունենք, բոլորը ռազմաբազա են տրամադրել Իրանի թշնամիներին, Իրանի դեմ գործողություններ են արել: Տարիներ շարունակ միակ երկիրը, որ ամենավստահելին է եղել և բարեկամ՝ դա Հայաստանն է»,- նշել է Հոսսեինին։ «Հետաքրքիր է, որ մեր բոլոր այդ հարևանները մուսուլմանական աշխարհից են, բայց միակ հարևանը, որ վստահելի է, քրիստոնյա հարևանն է, դա ցուցանիշն է, թե Իրանում ինչ վերաբերմունք ունեն քրիստոնեության, Հայաստանի, հայերի հանդեպ»,- հավելել է Հոսսեինին: