«Իրավապահները փորձել էին Արեգնազի միջոցով ցուցմունքներ ստանալ, չէին ստացել, ու փորձում են վրեժ լուծել»․ Գեղամ Մանուկյան

«Նիկոլ Փաշինյանը մեղադրանքը հնչեցնում է, իր ենթակա ուժայինները հաջորդ վայրկյանին անցնում են գործի և Անդրանիկ Թևանյանի գործը դրա ամենախայտառակ դրսևորումն է»,- դատարանի դիմաց, որտեղ ընթանում է «Մայր Հայաստան» կուսակցության առաջնորդ Անդրանիկ Թևանյանի և կուսակցության անդամ Արեգնազ Մանուկյանի գործով դատական նիստը, լրագրողների հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանը։ «Արեգնազի դեպքը շատ ավելի խայտառակ դրսևորում է, ընդհանարապես, մարդու իրավունքների ոտնահարում։ Մարդկային այն կտտանքները, որին ենթարկվում է Արեգնազ Մանուկյանը, տմարդի է, և հասկանալի է, թե ինչու․ իրավապահները փորձել էին Արեգնազի միջոցով ցուցմունքներ ստանալ: Ի պատիվ մեր գործընկերուհու՝ չէին ստացել, և քինախնդիր ձևով փորձում են շատ ավելի ծանր վրեժ լուծել»,- նշեց ընդդիմադիր գործիչը։