Արհեստական ​​բանականությունը կարող է ահաբեկիչներին հասանելիություն տալ կենսաբանական զենքին. Բրիտանական հակահետախուզություն

ԱԻ-ն (Արհեստական բանականությունը) մեծացնում է մահաբեր կենսաբանական զենքի մշակման ռիսկը, հայտարարել է MI5-ի (Բրիտանական հակահետախուզության) ղեկավարը։ Նման զենքը կարող է մշակվել ահաբեկիչների և թշնամական պետությունների կողմից, նշել է բրիտանական հետախուզական ծառայության գլխավոր տնօրեն Քեն Մաքքալումը։
«Մարդկության պատմության մեջ դեռևս չի եղել փորձառություն՝ բախվելու մի սուբյեկտի հետ, որը մեզնից խելացի է և ունակ է մեզ մտավոր առումով գերազանցել», - հայտարարել է Մաքքալումը՝ հանդես գալով Մեծ Բրիտանիային սպառնացող վտանգների մասին ամենամյա զեկույցով։
MI5-ի ղեկավարը խոսել է նաև թշնամական պետությունների կողմից բխող սպառնալիքների տարածման մասին։ Նրա խոսքով՝ վերջին 10 տարում Մեծ Բրիտանիան բախվել է Ռուսաստանի, Չինաստանի և Իրանի գործողությունների հետ կապված գործերի քանակի քառակի աճի։
Նման գործողությունների, այդ թվում՝ դիվերսիաների և կիբերհարձակումների դեմ պայքարի համար MI5-ը հատկացնում է ավելի շատ միջոցներ, քան Սառը պատերազմի ցանկացած ժամանակահատվածում, ընդգծել է Մաքքալումը։ Ավելի վաղ նմանատիպ հայտարարությամբ, թե ներկայիս սպառնալիքներն ավելի լայնածավալ են, քան Սառը պատերազմի ժամանակներում, հանդես էր եկել Գերմանիայի ՆԳՆ ղեկավարը։