«Նիկոլ Փաշինյանի ստորագրությունը որևէ միջնորդության տակ չկա․ ապագայում մեծ սիրով ասելու է՝ ես չկամ այդտեղ»․ Բագրատ Միկոյան

«Ռոբերտ Քոչարյանի կալանավորման հետ կապված ասում են, որ Նիկոլ Փաշինյանի հրահանգն է։ Նիկոլ Փաշինյանի ստորագրությունը կալանավորման որևէ միջնորդության և որևէ որոշման տակ չկա․ վաղը, մյուս օր, մոտ ապագայում, Փաշինյանը մեծ սիրով ասելու է, որ ես չկամ, իմ անուն- ազգանունը դրա տակ չկա»,- ասուլիսի ժամանակ ասել է ՀՀ երկրորդ նախագահի գրասենյակի ղեկավար Բագրատ Միկոյանը։ «Այս ապօրինի միջնորդությունների, որոշումների տակ կան կոնկրետ անուններ և ազգանուններ․ Աննա Վարդապետյան, Ծովակ Մնացականյան, վճիռները տվող դատավորներ։ Եվ սա կարող են համարել զգուշացում, խնդրանք, հորդոր՝ վաղը, մյուս օրը մորքուրները, հորքուրները, քեռիները և, առավել ևս, բաջանաղները որևէ միջնորդությամբ չգան, թե երեխաները չէին հասկանում, դե գիտեք ինչ․․․ երեխաները արդեն հասուն են, նախագահի դեմ կատարվող ապօրինություններն ունեն կոնկրետ անուն-ազգանուններով կատարողներ, իսկ պատասխանատվության պահը գալիս է շատ անսպասելի և սրյուրպրիզի տեսքով»,- շարունակել է Միկոյանը։