«Որոշումներն այստեղ չեն կայացվում, այս դատական շենքն ուզուրպացված է իշխանությունների կողմից»․ Գառնիկ Դանիելյան

«Որոշումներն այստեղ չեն կայացվում, այս դատական շենքը զուտ այն ինստիտուն է, որը մեծ մասամբ ուզուրպացված է իշխանությունների կողմից։ Դրա մասին է վկայում հենց այն փաստը, որ տուժող մարդը, ում շահերը պետությունը պետք է պաշտպաներ, այնպես է արել, որ տուժող կողմը ինչ որ «հրաշքով» մեղադրյալի կարգավիճակով հիմա դատարանի դահլիճում է, ենթարկվում է իրավական բեսպրիդելի»,- դատարանի բակում, որտեղ ընթանում է ԲՀԿ առաջնորդ Գագիկ Ծառուկյանի գործով դատական առաջին նիստը, լրագրողների հետ զրույցում ասել է ԱԺ նախկին պատգամավոր Գառնիկ Դանիելյանը։ «Ու այս պարագայում խոսել արդարադատության մասին՝ ծաղր է, սատիրա։ ՀՀ-ում այլևս որոշումները չեն կայացվում արդարադատության սկզբունքով, ՀՀ-ում արդեն իսկ որոշված է ով է մեղադրյալ, ով պիտի հայտնվի մեկուսարանում, ով պիտի հայտնվի քաղբանտարկյալի կարգավիճակում, ով զնդաններում, ով ԱԱԾ պադվալներում լինի։ Ու ցավալին այն է, որ այս ամենի հետևանքներն իր վրա զգում է հայ մարդը՝ աշխատող, արարող, ստեղծագործ, հայրենիք ու պատիվ ունեցող մարդը»,- շարունակել է Դանիելյանը։