Կիրակի, 01 նոյեմբերի, 2026 թ.
|
Ստեփանակերտում`   +15 °C

«Եվրոպայում կան քաղաքական գործիչներ, որոնք չեն վախենում խոսել պատմական ճշմարտության մասին». Սարգիս Տեր-Եսայան

«Եվրոպայում կան քաղաքական գործիչներ, որոնք չեն վախենում խոսել պատմական ճշմարտության մասին». Սարգիս Տեր-Եսայան
49
Այսօր, 15:30

Երևանի ավագանու «Մայր Հայաստան» խմբակցության անդամ Սարգիս Տեր-Եսայանը ֆեյսբուքյան իր էջում տեսանյութ է հրապարակել՝ կից գրելով. «Եվրոպայում կան քաղաքական գործիչներ, որոնք չեն վախենում խոսել պատմական ճշմարտության մասին
Եվրախորհրդարանում լեհ պատգամավոր Եվա Զայոնչկովսկա-Հերնիկը պատռել է Ուկրաինայի ազգայնական շարժման՝ UPA-ի կարմիր-սև դրոշը՝ հայտարարելով, որ Լեհաստանը չի կարող անտեսել այդ կազմակերպության պատմական պատասխանատվությունը լեհերի և այլ ժողովուրդների, այդ թվում՝ հայերի սպանությունների համար։
Նրա ելույթում հնչեց նաև շատ կարևոր ուղերձ, որ պատմական հանցագործությունները չեն կարող մոռացության մատնվել քաղաքական նպատակահարմարության կամ եվրոպական ինտեգրման անվան տակ։ Իսկ մեզ՝ հայերիս համար, այս խոսքում կա մի առանձնահատուկ կարևորություն, քանի որ մենք գիտենք, թե ի՞նչ է նշանակում, երբ ազգի պատմությունը խեղաթյուրում են, երբ զոհերի հիշողությունը փորձում են ջնջել, իսկ պատմական պատասխանատվությունը փոխարինում են քաղաքական քարոզչությամբ։
Այսօր Ադրբեջանը հետևողականորեն փորձում է ջնջել հայկական հետքը Արցախում, յուրացնել հայկական պատմամշակութային ժառանգությունը և կասկածի տակ դնել հայ ժողովրդի պատմական ներկայությունը տարածաշրջանում։ Եվ մենք իրավունք չունենք լռելու, երբ աշխարհի որևէ անկյունում մոռացության են մատնվում հայ ժողովրդի դեմ կատարված հանցագործությունները։
Պատմական հիշողությունը քաղաքական առևտրի առարկա չէ։ Հանցագործությունը չի դառնում արդարացված միայն այն պատճառով, որ դրա մասին խոսելը տվյալ պահին քաղաքականապես հարմար չէ։
Հայ ժողովուրդը պետք է կարողանա պաշտպանել իր պատմությունը, իր զոհերի հիշատակը և իր ազգային արժանապատվությունը՝ ոչ թե սպասելով, որ ուրիշները մեր փոխարեն կխոսեն»:

Աղբյուրը`   Սարգիս Տեր-Եսայան

Կարդացե՛ք նաև