«Սարգսյանը չցանկացավ կրկնել Մարտի 1-ի փորձը». Washington Post

«Երբ ես այնտեղ Արևելյան Գերմանիայի մի խումբ քաղաքացիների տեսա, հասկացա, որ նրանք ճիշտ են»,- այսպես իր ժամանակին բացատրեց փոխգնդապետ Հարալ Էգերը դարպասները բացելն ու համաքաղաքացիներին Բեռլինյան պատի միջով անցնելու թույլատրման որոշումը: Այս մասին Հայաստանում տեղի ունեցող զարգացումների մասին իր հոդվածում գրում է Washington Post-ի սյունակագիր Էն Էփլբաումը: «Այս շաբաթ ես հիշեցի Էգերի մասին, երբ Հայաստանի վարչապետը՝ տեսնելով իր ժողովրդին, հրաժարական տվեց»,- գրում է նա:

Սերժ Սարգսյանն, ինչպես հիշեցնում է լրագրողը, ղեկավարեց Հայաստանը 10 տարի: «Կանխատեսելով իր պաշտոնաթողությունը՝ նա որոշ օրենքներ փոխեց, ամրապնդեց վարչապետի իշխանությունն ու այնպես արեց, որ խորհրդարանն իրեն նշանակեց այդ պաշտոնին: Հայերը դա չհանդուրժեցին»,- նկատում է Էփլբաումը:

11 օր բազմահազարանոց ցույցեր տեղի ունեցան Երևանում: «Ես ճիշտ էի: Փողոցային շարժումն իմ պաշտոնավարման դեմ է, և ես կատարում եմ ձեր պահանջը»,- պարբերականը մեջբերում է Սարգսյանի խոսքը:

Պարբերականը մեջբերում է նաև Կովկասի հարցերով փորձագետ Թոմաս դե Վաալի կարծիքը, ում խոսքով՝ Սարգսյանի վրա ազդեց այն, որ Հայաստանն «ազգային համերաշխության բարձր զգացում ունեցող երկիր է»:

«Մեկ այլ հնարավոր գործոն է այն, որ վերջին անգամ, երբ հայերը նման զանգվածային ցույցեր անցկացրեցին (2008թ. մարտի 1-ին), 10 մարդ զոհվեց: Հնարավոր է, որ Սարգսյանը չցանկացավ կրկնել այդ փորձը»,- գրում է Էփլբաումը:

Լրագրողը Հայաստանի «հնարքը» համեմատում է Ռուսաստանի և Թուրքիայի օրինակի հետ. ՌԴ նախագահ Վլադիմիր Պուտինն ու Թուրքիայի նախագահ Ռեջեփ Էրդողանը նմանատիպ «խաղ խաղացին»՝ փոխելով նախագահությունն ու վարչապետությունը: