«Տեղի է ունենում հայկական պետականության «կենցաղայնացում»»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Այսօր տեսանյութեր են տարածվել, որ խորհրդարանում է Սուպեր Սաքո անունով երգիչը: ԱԺ նախագահը, որ մտերիմ է նրա հետ, նույնիսկ ողջունել է։ Չգիտեմ, խորհրդարանում նրա հետ նկարվելու ցանկություն ունեցողներ եղել են, թե՞ ոչ:

Սա սիմպտոմատիկ երևույթ է: Առաջին հայացքից կարող է թվալ, թե ընդամենը մի դրվագ է, սակայն սա պետական քաղաքականության սիմպտոմ է, կամ ավելի շուտ՝ ապապետական քաղաքականության սիմպտոմ: Խորհրդանշական է, օրինակ, որ գործնականում նույն ժամերին Նիկոլ Փաշինյանը Վանաձորում նորակառույց դպրոցում հերթական անգամ հայտարարել է, որ դպրոցը իրենց համար այն տեղն է, որտեղ երեխաները պետք է սովորեն լավ ապրել:

Ես այս «բանաձևին» անդրադարձել եմ դեռևս սեպտեմբերի 1-ին, երբ կառավարությունից հնչել էր այդ ուղերձը: Եթե դպրոցը պետական անձանց համար ընդամենը լավ ապրել սովորելու վայր է, ապա որևէ կերպ զարմանալի չէ, որ խորհրդարանն էլ մի վայր է, որտեղ կարող է այցելության գալ սուպեր սաքոն և արժանանալ ԱԺ նախագահի ընկերական ողջույնին: Զարմանալի չէ, որ պետական դատական իշխանության բարձրագույն ներկայացուցիչը հետո կարող է աշխատանքի անցնել կառավարության ղեկավարին կից գրասենյակում:

Ինչպես ասել եմ՝ տեղի է ունենում հայկական պետականության «կենցաղայնացում»: Պետական մշակույթի նշաձողերը իջեցվում են կենցաղային մշակույթի մակարդակի: Եթե նախկինում դրանք եղել են՝ թեկուզ զգալիորեն ձևական, փաթեթային մակարդակի, այդուհանդերձ եղել են, հիմա այդ փաթեթն էլ պատռում են ու դեն գցում և պարզապես բաց տեքստով պետական մշակույթը բերում կենցաղային հարաբերությունների և մշակույթի աստիճանի»: