«Ես ձեզ շատ եմ կարոտել». Նիկոլ Փաշինյանը մեծ հանրահավաքի է հրավիրում (տեսանյութ)

ՀՀ վարչապետ Նիկոլ Փաշինյանը «Ֆեյսբուք»-ի իր էջում ուղիղ եթերով քաղաքացիներին հրավիրել է մեծ հանրահավաքի՝ վարչապետության 100 օրվա առթիվ:

«Լրանում է իմ՝ վարչապետ ընտրվելու 100 օրը, և ես առաջարկում եմ, որ օգոստոսի 17-ին ժամը 18:30-ին Հանրապետության հրապարակում՝ մեր ավանդական դարձած հանդիպման վայրում, մեծ հանրահավաք հրավիրենք և հանդիպենք: Չգիտեմ՝ դուք ոնց, բայց ես ձեզ շատ եմ կարոտել, նորից շփվելու հնարավորություն կունենանք: Կարծում եմ՝ պետք է կարևոր խոսակցություն ունենանք այն մասին, թե ՀՀ-ում ինչ է տեղի ունեցել վերջին 100 օրվա ընթացքում և ինչ է տեղի ունենալու, թե ինչ քայլեր է ձեռնարկել կառավարությունը Հայաստանում թռիչքաձև զարգացում ապահովելու համար: Եվ կոնկրետ ինչ քայլերով ենք մենք պատրաստվում այդ զարգացումն ապահովել: Եվ, ընդհանրապես, խոսել այսօրվա Հայաստանի մասին, երեկվա Հայաստանի մասին, վաղվա Հայաստանի մասին»,- ասել է Նիկոլ Փաշինյանը:

Վարչապետը նշել է, որ այդ հանրահավաքը չափազանց կարևոր իրադարձություն է, կարևոր է յուրաքանչյուրի մասնակցությունը՝ ապագայի կայուն հիմքերը դնելու, արդեն գործնականում ՀՀ-ի զարգացման մեկնարկը տալու և այն խնդիրների մասին խոսելու համար, որի հետ այս ընթացքում բախվել է ՀՀ նոր կառավարությունը: