Ինդոնեզիայում ավիադիսպետչերն իր կյանքի գնով փրկել է հարյուրավոր ուղևորներով լի օդանավը

Ինդոնեզիայում 21-ամյա ավիադիսպետչեր Անտոնիուս Ագունգն իր կյանքն է զոհաբերել՝ փրկելով հարյուրավոր ուղևորների: Անձնազոհ պատանին գտնվելիս է եղել Սուլավեսի կղզու Պալու օդանավակայանի աշտարակի վրա, երբ զգացվել են 7,4 մագնիտուդ ուժգնությամբ առաջին ցնցումները, գրում է Daily Mail-ը: Բոլորն շտապ տարհանվել են, սակայն Ագունգը մնացել է աշտարակի վրա այնքան ժամանակ, մինչև Batik Air-ի օդանավը՝ հարյուրավոր ուղևորներով լի, անվտանգ օդ է բարձրացել: Թռիչքուղով ընթացող օդանավի անիվների տակ ասֆալտը ճաքճքելիս է եղել և Ագունգը ուղղորդել է օդաչուներին:

Երբ օդանավն օդ է բարձրացել, արդեն ուշ է եղել, հաջորդել է առավել ուժգին ցնցում, աշտարակն սկսել է փլվել: Երիտասարդը փորձել է փրկվել՝ նետվելով 4-րդ հարկի բարձրությունից, նրան ներքին բազմաթիվ կոտրվածքներով տեղափոխել են հիվանդանոց, սակայն հաջորդ օրը մահացել է:

Մի ամսից նա կտոներ իր 22-րդ տարեդարձը:

Հիշեցնենք, որ երկրաշարժի ու դրան հաջորդած ուժգին ցունամիի պատճառով Ինդոնեզիայում զոհվել է 832 մարդ, զոհերի թիվն, ամենայն հավանականությամբ, կաճի: