Չորեքշաբթի, 12 դեկտեմբերի, 2018 թ.
|
Ստեփանակերտում`   +9 °C

«Շատ կարևոր է արձանագրել և միջազգային հանրության համար ավելի ընկալելի դարձնել, թե ինչն է պատճառը, որ ծագել է Ղարաբաղի հարցը». Նիկոլ Փաշինյան

«Շատ կարևոր է արձանագրել և միջազգային հանրության համար ավելի ընկալելի դարձնել, թե ինչն է պատճառը, որ ծագել է Ղարաբաղի հարցը». Նիկոլ Փաշինյան
319
Շաբաթ, 13 հոկտեմբերի, 2018 թ., 12:05

«Հայկական համայնքը կարևոր դեր է խաղում Կանադայում ոչ միայն անցյալի ողբերգությունները հասկանալու, այլ նաև երաշխավորելու համար: Կանադան շատ կարևոր դեր է խաղում աշխարհում նման ոճիրների ազդեցությունը նվազեցնելու ուղղությամբ: Մենք շարունակելու ենք ջատագովել միջազգային մակարդակով ընդունումն ու ճանաչումը»: Այս մասին այսօր լրագրողների հետ հանդիպման ժամանակ ասել է Կանադայի վարչապետ Ջասթին Թրյուդոն:

ՀՀ վարչապետ Նիկոլ Փաշինյանն, իր հերթին, հավելել է, որ Հայոց ցեղասպանության միջազգային ճանաչումը միայն անցյալի ճանաչման խնդիր չէ, այլև ապագայի կառուցման խնդիր:

«Կարևոր է արձանագրել, որ Հայաստանի համար դա ունի երկու կարևոր իմաստ: Առաջինը՝ Հայաստանն իր նպաստն է բերում ցեղասպանությունների կանխարգելման գլոբալ պայքարին և, երկրորդ, ՀՀ-ի համար Հայոց ցեղասպանության միջազգային ճանաչումը նաև անվտանգության խնդիր է, որովհետև, շատ կարևոր է արձանագրել, որ, ըստ էության, այսօր մենք ունենք սպառնալիքի պոտենցիալ: Օրինակ՝ մինչև հիմա Հայաստանի սահմանները փակված են Թուրքիայի կողմից, և Հայաստանը գտնվում է բլոկադայի մեջ: Մեզ համար սա անվտանգային սպառնալիք է, և մեր քննարկումների ժամանակ խոսեցինք նաև Ղարաբաղի մասին: Եվ ես ընդգծեցի, որ շատ կարևոր է արձանագրել և միջազգային հանրության համար ավելի ընկալելի դարձնել, թե ինչն է պատճառը, որ ծագել է Ղարաբաղի հարցը, որովհետև, ցավոք սրտի, միջազգային շփումներում երբեմն տպավորություն է ստացվում, որ կան շրջանակներ, որոնք Ղարաբաղի խնդիրն ընկալում են որպես տարածքային խնդիր, դա բացարձակապես այդպես չէ: Ղարաբաղի հարցը ծագել է այն համատեքստում, որ Արցախում ապրող հայերի առաջ կանգնել է ցեղասպանության, նոր ցեղասպանության սպառնալիք: Եվ աչքի առաջ ունենալով ցեղասպանության նախկին փորձը՝ մարդիկ ցանկացել են և ցանկանում են պաշտպանել ապրելու իրենց իրավունքը»,- ասել է վարչապետը: