«Գերնսի կղզին, պարզվում է, բավականին ուշագրավ կարգավիճակ ունի». Ռուբեն Շուխյան

Պատմաբան Ռուբեն Շուխյանը սոցկայքի իր էջում գրել է. «Ֆրանսիայի հյուսիսի՝ Նորմանդիայի ծովափից ոչ հեռու, Անգլիական նեղուցում (Լա-Մանշ) գտնվող Գերնսի կղզին (անգլերեն՝ Guernsey), պարզվում է, բավականին ուշագրավ կարգավիճակ ունի: Գերնսին Բրիտանական թագի կախյալ տարածքն է, սակայն Մեծ Բրիտանիայի մաս չի համարվում։ Այս շրջանը, որի ադմինիստրատիվ կենտրոնը Սենտ Փիթեր Պորտ նավահանգստային քաղաքն է, չի մտնում նաև Եվրոմիության կազմի մեջ, սակայն համարվում է Եվրոմիության մաքսային տարածքի մասը: Բացի համանուն ամենամեծ կղզուց՝ Գերնսիի թագավորական տիրապետության կազմի մեջ են մտնում նաև մի քանի այլ կղզիներ։
Գերնսիի ափերին կարելի է տեսնել բազմաթիվ դղյակներ, բերդեր, ամրոցներ և դիտակետեր, որոնք պայմանավորված են կղզիների աշխարհագրական դիրքով և հարուստ ռազմական անցյալով: 1993 թվականից Գերնսիում մեկնարկել է ռազմապատմական արժեքները պահպանելուն ուղղված շարունակական ծրագիր, որի շնորհիվ այս տարածքը ներկայումս զբոսաշրջային խոշոր կենտրոն է դարձել»։