Երեքշաբթի, 20 նոյեմբերի, 2018 թ.
|
Ստեփանակերտում`   +8 °C

«Միակ փող բերող թեման էր, վճարողներն էլ առատաձեռն էին». Լիզա Ճաղարյան

«Միակ փող բերող թեման էր, վճարողներն էլ առատաձեռն էին». Լիզա Ճաղարյան
76
Երեքշաբթի, 30 հոկտեմբերի, 2018 թ., 11:45

Լրագրող Լիզա Ճաղարյանը ֆեյսբուքյան իր էջում գրել է.

«ՀՀԿ-ական ռեժիմի տարիներին լրատվամիջոցների 99 տոկոսն «անվախ» ու «անաչառ» էր միայն մեկ ուժի և նրա առաջնորդի նկատմամբ՝ Հայ ազգային կոնգրեսի ու Լևոն Տեր-Պետրոսյանի։ Թաքուն բան չկա. թերթեք այդ տարիների մամուլը (դե, Ֆեյսբուքի մասին էլ չասեմ)։ Ամբարտավանություն, կեղծիք, ստորություն, նենգություն... Չկայացած կամ վաղուց մոռացված, այսպես կոչված՝ քաղաքական գործիչների հարցազրույց-բարբաջանքներ, ցանկացած ասուլիսում որպես պարտադիր ծրագիր՝ անպայման հիշեցնել, որ ՀՀ առաջին նախագահը Ղարաբաղը ծախել է, չի թողել Բաքվում չայ խմենք, հողը տոկի է տվել, վայ չէ՝ տոկն է հողին տվել... ու էսպիսի շիզոֆրենիկ զառանցանքներ քսան տարի շարունակ... Չէին հոգնում։ Միակ փող բերող թեման էր, վճարողներն էլ առատաձեռն էին։
Հիմա իրավիճակ է փոխվել։
Նույն մեթոդներով, նույն ստոր, նենգ միջոցներով հիմա էլ գրում են նոր կառավարության դեմ, նույնպիսի մաղձութույնով, նույն «բարոյականության» չափանիշներով։ Առյուծի սի՞րտ են կերել տարիներ շարունակ հանցագործ ՀՀԿ-ականների հետ անուշ-բարիշ ապրող էս ԶԼՄ-ներն ու նրանց անորոշ-անկատար, կիսատ-պռատ լրագրողները, ի՞նչ պատահեց, որ այս պատեհապաշտները հանկարծ այսպես «կտրիճդավոներ» դարձան։
Ոչ մի բան էլ չի փոխվել։ Պարզապես սրանց վճարողները կրկին նույն մարդիկ են։ Իշխանությունը կորցրել են, բայց Հայաստանի քաղաքացիներից գողացած փողը դեռ սրանց գրպաններում է։ Ու շարունակում են վճարել։ Թիրախն է փոխվել։
Ու էսպես՝ պալատական սազանդարները մեկ էլ անսպասելի դարձել են «անաչառ» ու «քաջարի», իշխանությանն են քննադատում՝ կրկի՛ն չխորշելով ոչ մի ստոր, ճիվաղային միջոցից։
Չգիտեմ՝ որտեղ է իրավիճակ փոխվել, բայց լրագրողական աշխարհում ՀՀԿ-ական անբարոյականությունն է իշխում։
Եղկելի է»։