Մանվել Գրիգորյանի փաստաբանը տեղյակ չէ, թե ինչ հիմքով է ազատ արձակվել իր պաշտպանյալը

«Մանվել Գրիգորյանը ցուցմունք է տվել և նշել, որ չի ընդունում իրեն մեղսագրված արարքը և ինքն ավելի շատ է շահագրգռված, որ նախաքննություն ընթանա և պետական լիազոր մարմինն օբյեկտիվ գնահատական տա»,- այսօր հրավիրած մամուլի ասուլիսին՝ պատասխանելով հարցին, թե արդյոք Մանվել Գրիգորյանը ցուցմունք տվե՞լ է այն մասին, որ Պաշտպանության նախարարությունը կամ ԼՂ ՊԲ-ն տեղյակ է, որ իրեն պատկանող տարածքներում նման ապրանքներ են պահվում, ասել է փաստաբան Լևոն Բաղդասարյանը:

Հարցին, թե բացի առողջական վիճակը, դատարանն ուրիշ ի՞նչ հիմքով է ազատ արձակել Մ. Գրիգորյանին, վերջինը նշել է. «Դատարանն օրենքով սահմանված կարգով քննեց միջնորդությունը գրավ կիրառելու հետ կապված և գտավ, որ այն իրավաչափ է՝ կայացնելով համապատասախան ակտը»: Թե ի՞նչ հիմքերով, փաստաբանը չպատասխանեց՝ նշելով, որ չի հասցրել ծանոթանալ դատական հիմքերին, դա կանի տոներից հետո՝ «մի լավ կծանոթանա» և կներկայացնի. «Ավելին՝ կտեսնենք, թե ինչ հիմքերով է ներկայացնում բողոքը լիազոր մարմինը, որից հետո իմ դիրքորոշումը կհայտնեմ»:

Բաղդասարյանը նշեց, որ դատարանը հանուն Հայաստանի Հանրապետության կայացրել է համարձակ, իրավաչափ և հեղինակավոր ակտ՝ փրկելով Հայաստանին՝ վաղը, Եվրոպական դատարանում, ավելորդ կարմրելուց: «Ծանր վիճակում հայտնված դատական իշխանության մեջ դատավորների մի հատված թքած ունի թե՛ անձի, թե՛ անձի ճակատագրի վրա, մի հատվածն էլ գտնվում է ՀՔԾ-ի կամ այլ ծառայությունների կոշիկի տակ»,- կարծիք հայտնեց փաստաբանը: