«Սահմանադրական կարգը երկու անգամ Լևոն Տեր-Պետրոսյանն է տապալել, երկու անգամ էլ՝ Նիկոլ Փաշինյանը». Արամ Հարությունյան

«Ազգային համաձայնություն» կուսակցության նախագահ Արամ Հարությունյանն այսօր լրագրողների հետ զրույցի ժամանակ ասաց, որ ՀՀ գլխավոր դատախազ Արթուր Դավթյանին ներկայացնելու է հաղորդում՝ կապված 1996 թվականի նախագահական ընտրությունների արդյունքները կեղծելու, ընտրություններից հետո սահմանադրական կարգը տապալելու, ինչպես նաև իր նկատմամբ առանձնապես դաժանությամբ բռնություն կիրառելու և խոշտանգելու վերաբերյալ քրեական գործ հարուցելու և մեղավորներին պատասխանատվության ենթարկելու խնդրանքով: «Կոնկրետ փաստերը կան, անունները կան, թե ովքեր են կեղծել, բոլորը ներկայացված են հաղորդման մեջ»,- ասում է նա:

Զրույցի ընթացքում Հարությունյանը նշեց, թե ՀՀ-ում քանի անգամ է տապալվել Սահմանադրական կարգը և ում կողմից. «Սահմանադրական կարգը տապալվել է 1996-ին Լևոն Տեր-Պետրոսյանի կողմից, վերականգնվել՝ 98-ին, տապալման փորձ արվել է 2008-ին՝ նորից Լևոն Տեր-Պետրոսյանի կողմից. 2008-ին ընդդիմությունը, հանձինս Լևոն Տեր-Պետորսյանի և Նիկոլ Փաշինյանի, տապալեցին Սահմանադրական կարգը: Տապալում եղել է նաև 2018-ի մայիսին, երբ ճնշման տակ ստիպել են պատգամավորներին քվեարկել իրենց օգտին: Սահմանադրական կարգը երկու անգամ Լևոն Տեր-Պետրոսյանն է տապալել, երկու անգամ էլ՝ Նիկոլ Փաշինյանը»,- ասաց Հարությունյանը: