Գուայդոն «խայտառակ» գործադուլներ է խոստանում

Վենեսուելայի ընդդիմության առաջնորդ Խուան Գուայդոն կոչ է արել շարունակել գործադուլները, որպեսզի նախագահ Նիկոլաս Մադուրոյին ստիպի հրաժարվել իշխանությունից: Այս մասին հաղորդում է BBC-ն: Գուայդոն պետական աշխատողներին հորդորել է միանալ համընդհանուր գործադուլին:

Հիշեցնենք, որ չորեքշաբթի Կարակասում ցուցարարների և ոստիկանության միջև տեղի ունեցած բախումների հետևանքով 1 կին մահացել էր, իսկ 10-ը վիրավորվել էին: Գուայդոն նշել էր, որ այդ գործում ներգրավված անձինք պետք է պատժվեն: Վենեսուելայի ճգնաժամի հետևանքով լարվել էին Ռուսաստանի ու ԱՄՆ-ի հարաբերությունները: ԱՄՆ պետքարտուղար Մայք Պոմպեոն ասել էր, որ ԱՄՆ-ն ճգնաժամը կարգավորելու նպատակով, հնարավոր է, ռազմական միջամտության դիմի: Միևնույն ժամանակ, Պոմպեոն Ռուսաստանին ու Կուբային մեղադրել էր Մադուրոյին աջակցելու միջոցով երկրում անկայուն դրության ստեղծման մեջ:

Ռուսաստանի ԱԳ նախարար Սերգեյ Լավրովն արձագանքել էր, որ Վենեսուելայում ԱՄՆ միջամտությունը կործանարար է և հակասում է միջազգային իրավունքի նորմերին:

Նշենք, որ հունվարին Գուայդոն իրեն Վենեսուելայի նախագահ էր հռչակել: Նրա իշխանությունն օրինական են համարել ավելի քան 50 երկրներ, այդ թվում՝ ԱՄՆ-ն, Մեծ Բրիտանիան և Լատինական Ամերիկայի երկրների մեծ մասը: Մադուրային սատարող Ռուսաստանն ու Չինաստանը չեն ճանաչել Գուայդոյի իշխանությունը: