«Մենք կորուստներ ենք ունենում ձեր վաճառած զենքի պատճառով». Զոհրաբ Մնացականյանը՝ իսրայելական հեռուստաալիքին

ՀՀ ԱԳ նախարար Զոհրաբ Մնացականյանը օրերս հարցազրույց է տվել իսրայելական KAN NEWS հեռուստաալիքին: Նա անդրադարձել է Իսրայելի կողմից Հայոց ցեղասպանությունը չճանաչելու, ինչպես նաև իսրայելական զենքի վաճառքի թեմաներին:
Լրագրողը նրան հարց է հղել՝ արդյոք նրան չի զարմացնում հարցը, որ Իսրայելը չի ճանաչել Հայոց ցեղասպանությունը: «Հարցը զարմանալուն չի վերաբերում: Գիտեք, ես ներկայացնում եմ մի երկիր, որը դեռ պայքարում է մերժված արդարության դեմ:

Իմ ժողովուրդն անցել է դրա միջով, բայց միևնույն ժամանակ հաղթել է, քանի որ մեզ մտադիր էին բնաջնջել Երկրի երեսից, իսկ մենք այսօր վստահ երկիր ենք և հզոր, ծաղկուն և ինքնավստահ համայնքներ ունենք աշխարհով մեկ:
Ցեղասպանության ընդունումը մարդկության հարց է: Այժմ Իսրայելը պետք է որոշի՝ աջակցե՞լ ցեղասպանությունների կանխարգելմանը, մարդկային գիտակցությանը, մարդու իրավունքներին և արդարությանը, թե ոչ»,- պատասխանել է Մնացականյանը:

Հաջորդ հարցին, որը վերաբերում էր Ադրբեջանին վաճառվող իսրայելական զորքին, Մնացականյանը ասել է հետևյալը. «Իսրայելի զենքի առևտուրը մեր ժողովրդի համար մահացու ազդեցություն ունի: Մենք տեսել ենք՝ ինչպես են կիրառել այդ զենքը մեր ժողովրդի դեմ, մենք կրել ենք կորուստներ ձեր զենքի պատճառով: Դուք հասկանում եք՝ ինչպես ենք մենք վերաբերվում դրան: Մենք շարունակում ենք վստահաբար պաշտպանել մեր ժողովրդին: Մենք լիովին հակված ենք խաղաղություն և անվտանգություն հաստատել մեր տարածաշրջանում, համակարտության խաղաղ ուղիներ փնտրել բոլոր կողմերի համար ընդունելի պայմանների հիման վրա: Մեր տարածաշրջանում սպառազինման մրցավազքը չի նպաստում խաղաղաշինությանն ու անվտանգության ապահովմանը»: