Շաբաթ, 17 օգոստոսի, 2019 թ.
|
Ստեփանակերտում`   +21 °C

«Որպեսզի համեղ լինի, պետք է պատրաստել սիրով». Արցախի Հաթերք գյուղում նշվեց Ժենգյալով հացի փառատոնը

«Որպեսզի համեղ լինի, պետք է պատրաստել սիրով». Արցախի Հաթերք գյուղում նշվեց Ժենգյալով հացի փառատոնը
328
Կիրակի, 12 մայիսի, 2019 թ., 17:10

Արցախի Հաթերք գյուղում երեկ տոն էր. նշվում էր Արցախյան խոհանոցի այցեքարտը համարվող Ժենգյալով հացի երկրորդ փառատոնը: Փառատոնի ստեղծման մտահաղացումը «Էկոտուրիզմ Արցախում» նախաձեռնող խմբի ղեկավար Սամվել Միրզախանյանինն է. «Ժենգյալով հացի փառատոնը սկսվել է 2018 թվականից: Նպատակը մեկն էր՝ մեծացնել Հաթերք գյուղի ճանաչելիությունը, որին կմասնակցեին տասնյակ հազարավոր մարդիկ, բարձրաստիճան պաշտոնյաներ, ինչը կնպաստեր համայնքը ուշադրության կենտրոնում պահել»,- լրագրողների հետ զրույցում ասաց Սամվել Միրզախանյանը:

Սամվել Միրզախանյան
Սամվել Միրզախանյան

Գողտրիկ Հաթերքն իր գեղատեսիլ բնաշխարհով

Հաթերքը Արցախի ամենահին բնակավայրերից է. ունի շուրջ 2500 տարվա պատմություն: Գյուղում կան շատ հին խաչքարեր, մատուռներ, 5-10-րդ դարի եկեղեցի, սիրահարների քարանձավ, որի հետ հետաքրքիր լեգենդ է կապված:

«Դադիվանք» վանական համալիրը
«Դադիվանք» վանական համալիրը
Հաթերքում է գտնվում Արցախի ամենաբարձր գագաթը՝ 3 724 մ բարձրության Գոմշասարը, Թարթառի հովիտը՝ գեղատեսիլ բնաշխարհով:

«Փաստացի 3000 մ հարաբերական բարձրության շնորհիվ Հաթերքում կարելի է տարվա ցանկացած եղանակին ականատես լինել եզակի մի երևույթի. բոլոր չորս եղանակները միանգամից. մի տեղ՝ ձմեռ, միջին գոտիներում՝ գարուն-ամառ, մի այլ տեղ՝ ձմռան հետքեր...և այսպիսի հզոր պոտենցիալը, ցավոք, մինչ այժմ չէր օգտագործվում: Այսօր արդեն, միջոցառման շնորհիվ, շատ մեծ հետաքրքրություն է առաջացել Հաթերքի հանդեպ»,- նշում է կազմակերպիչը:

«Կոտրվում են» կարծրատիպերը

Սամվել Միրզախանյանի խոսքով՝ նախկինում գյուղացիների համար խորթ էր, թե ինչպես պետք է տուրիստների ընդունեն, իսկ այսօր, արդեն, տասնյակ ընտանիքներ հարյուրավոր հյուրերի են ընդունել: «Նրանք փառատոնի համար մեկ օր առաջ են եկել և նրանց համար գիշերակաց է կազմակերպվել...Նախկինում, եթե միջոցառման մասնակիցները նույնիսկ ամաչում էին ժենգյալով հացը տեղում թխել, այսօր արդեն «կոտրվում է» այդ կարծրատիպը. նրանց ենթագիտակցությունում արմատավորվում է այն գաղափարը, որ իրենք ևս կարող են իրենց ձեռքի աշխատանքի շնորհիվ միջոցներ հայթայթել և, ամենակարևորը, մեծ պատասխանատվություն են զգում պատշաճ մակարդակով համայնքը ներկայացնելու համար»,- պատմում է մեր զրուցակիցը՝ ընդգծելով, որ փառատոնի նպատակն է խրախուսել գյուղացիների տեղական գյուղմթերքի արտադրությունը և ստացված հասույթով Հաթերքում մի շարք սոցիալական ծրագրեր իրականացնել:

Ժենգյալով հացի համի գաղտնիքը

Միջոցառման մասնակիցները հյուրերին ծանոթացնում էին ժենգյալով հացի պատրաստման հմտություններին, առանձնահատկություններին և գաղտնիքներին՝ վստահեցնելով, որ բազմաթիվ կանաչիներով լցոնված այս ուտեստը, որպեսզի համեղ լինի, պետք է պատրաստել սիրով...

Ի դեպ, եթե գյուղացիներն անցած տարի ընդամենը 15 տաղավար ունեին, այսօր դրանց թիվը 120-ի է հասել:

:

Նշենք, որ միջոցառումը ուղեկցվում էր կենդանի երաժշտությամբ, ազգային երգ ու պարով, համերգային և շոու ծրագրերով։