Մովսես Հակոբյանը՝ ապրիլյան դեպքերի և Մարտի 1-ի բացահայտումների մասին

Ապրիլյան դեպքերի հետ կապված վարչապետը հրահանգել է հանձնաժողով ստեղծել, ի՞նչ բացահայտումներ կլինեն, ի՞նչ եք կարծում. Հանրապետությա օրվա առթիվ Սարդարապատում լրագրողներն այսպիսի հարց ուղղեցին ՀՀ ԶՈՒ Գլխավոր շտաբի նախկին պետ, գլխավոր ռազմական տեսուչ Մովսես Հակոբյանին: Վերջինը արձագանքելով ասաց. «Տեղյակ չեմ, հանձնաժողովի անդամ չեմ»:

Հարցին՝ հնարավո՞ր է բացահայտվի, որ պայմանավորվածություններ են եղել, պատասխանեց. «Չէ, բացառում եմ»:

Դիտարկմանը, որ զոհվածների հարազատներն ուշագրավ հայտարարություններ են անում ապրիլյան պատերազմի վերաբերյալ՝ նշելով, որ այն պայմանավորված է եղել, Մովսես Հակոբյանն ասաց. «Հարգանք ունենալով զոհվածների հարազատների հանդեպ, բայց կարծում եմ, որ իրենք չէ, որ պիտի որոշեն ինչ է եղել»:

Հարցին՝ այնուամենայնիվ հնարավո՞ր է բացահայտվի, որ վառելիքի, զենքի, ուշ հրաման տալու խնդիր է եղել, պատասխանեց, որ առաջին երկու հարցի հետ կապված բացառում է, որ ինչ-որ բան բացահայտվի:

Մարտի 1-ին առնչվող հարցին, թե Պետական վերահսկողական ծառայության պետի խորհրդական Աշոտ Վանյանը, ով 2008-ին Գորիսի կայազորի ռազմական ոստիկանության պետ է եղել, հայտարարել է, որ 2008-ի մարտի 1-ին Ղարաբաղից զինծառայողների շարասյուն է մտել Հայաստան, և ինքն անձամբ է դիմավորել, Մ. Հակոբյանը պատասխանեց. «Պաշտպանության բանակի զինծառայողները, այո մասնակցել են, բայց Արցախի զինված ուժերից որևէ մեկը չի մասնակցել»: