«Օրինաչափ որոշում է կայացվել». Լևոն Քոչարյան

«Օրինաչափ որոշում է կայացվել: Նիստի ընթացքում երևացին թույլ տրված ապօրինություններն ու քննիչի փնթի աշխատանքը, որը պետք է վերահսկեին դատախազները: Երբ մենք 1 տարի առաջ բարձրաձայնում էինք այս մասին, որոշ մարդիկ լավ չէին պատկերացնում՝ ինչի մասին է խոսքը». հուլիսի 24-ին ՀՀ վերաքննիչ քրեական դատարանում վճիռը հրապարակվելուց հետո հայտարարեց Ռ. Քոչարյանի կրտսեր որդի Լևոն Քոչարյանը:
Հիշեցնենք, որ դատարանը՝ դատավոր Արսեն Նիկողոսյանի նախագահությամբ, մերժեց ՀՀ երկրորդ նախագահ Ռոբերտ Քոչարյանի գույքի վրա դրված կալանքի հարցով ՀՀ դատախազության բողոքը:

Այս որոշումը ևս Գլխավոր դատախազությունը կարող է բողոքարկել 15-օրյա ժամկետում:
Լրագրողի հարցին, թե իր միջոցով քաղաքական մեսիջներ փոխանցվո՞ւմ են, ինչի մասին գրել է մամուլը, Լ. Քոչարյանն ասաց, որ հոր հետ տեսակցում է շաբաթական 1 անգամ և նրա հետ քննարկում է անձնական հարցեր, մեսիջներ իր միջոցով չեն փոխանցվում: