ՄԱՄՈՒԼ․am-ը ճիշտ էր, Ոստիկանությունը սխալվեց․ լկտի վարորդները ոստիկաններ էին

«Լկտի վարորդներ և պարապ ոստիկաններ՝ Վալերի Օսիպյանի աշխատասենյակի պատուհանի տակ» նյութի հրապարակումից հետո Ոստիկանությունը հանդես եկավ պարզաբանումով․ «Եթե MAMUL.am-ը գոնե տասը րոպե հետևեր ոստիկանության աշխատանքին․․․ նման հոդված չէր հրապարակի»։
MAMUL.am-ը լսեց Ոստիկանության «հորդորը» և ընդամենը 10 րոպե նկարահանում իրականացրեց Ոստիկանության շենքի դիմաց՝ Վալերի Օսիպյանի աշխատասենյակի պատուհանի դիմաց։ Խմբագրության տեսախցիկն արձանագրեց, որ Ոստիկանության աշխատակիցները, հենց Ոստիկանության շենքի դիմաց, մեքենաները վարում են միակողմանի երթևեկությանը հակառակ ուղղությամբ։ Հատկանշական է, որ նման վարք դրսևորող ոստիկաններն այդ օրը մասնակցել էին աշխատավարձային պարգևատրման արարողությանը։
Հրապարակվեց նոր նյութ՝ «Պարզվում է՝ լկտի վարորդների մի մասը Ոստիկանության «24 ժամ աշխատող, պարգևատրումներ ստացող» աշխատակիցներն են (ԲԱՑԱՌԻԿ ՏԵՍԱՆՅՈՒԹԵՐ)», որտեղ նշվել էր, որ խմբագրությունը ֆիքսել է լկտի վարորդների ավտոմեքենաների պետհամարանիշերը և հետևելու է՝ արդյո՞ք կկիրառվեն պատժիչ գործողություններ վերջինների նկատմամբ։
Նյութի հրապարակումից հետո, Ոստիկանությունը խնդրեց տրամադրել պետհամարանիշերը։
Շուրջ երկու շաբաթ անց, խմբագրությունը ստացել է գրություն, որտեղ նշված է․ «․․․ 4 տրանսպորտային միջոցների վարորդները հանդիսանում են ոստիկանության ծառայողներ․․․ վերջիններիս նկատմամբ կարգապահական տույժ չի կիրառվել․․․ կազմվել են վարչական իրավախախտման արձանագրություններ (ԱԴ983011, ԱԴ983012, ԱԴ983013, ԱԴ983014)․․․ սահմանվել է 20.000-ական դրամ վարչական տուգանք»։

Հետգրություն

Հաշվի առնելով վերոնշյալը՝ MAMUL.am լրատվական գործակալությունը պահանջում է, որպեսզի ՀՀ ոստիկանությունը՝

1․ հրապարակային ներողություն խնդրի MAMUL.am-ի խմբագրությունից՝ չհիմնավորված «Պարզաբանում» հրապարակելու համար,

2. ներողության տեքստը հրապարակի police.am-ում և կայքի՝ ֆեյսբուքյան պաշտոնական էջում,

3. police.am-ից և կայքի ֆեյսբուքյան պաշտոնական էջերից հեռացնի ս/թ հունիսի 17-ի պարզաբանման տեքստերը։

Վերոնշյալ պահանջների չկատարման դեպքում խմբագրությունը կդիմի դատարան՝ Ոստիկանության դեմ զրպարտության մեղադրանքով։

Ավելին․ խմբագրությունը կսահմանի հերթապահություն Ոստիկանության շենքի դիմաց և ամենօրյա հաճախականությամբ հանրությանը կներկայացնի ոստիկանության աշխատակիցների օրինախախտումներն ու պետավտոտեսչության պարապ՝ անուշադրության դրսևորումները։

Վերոնշյալ պահանջները խմբագրությունը պաշտոնական գրությամբ ուղարկելու է նաև ՀՀ ոստիկանապետ Վալերի Օսիպյանին։