«Բացառված չէ, որ վարչապետը կդիմի ուժային լուծման». Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Միամտություն է կարծելը, թե Փաշինյանը գիտակցում է, որ սարի պահապանների դեմ ուժային գործողությունն իր վարկանիշը կզրոյացնի: Այդպես մտածելը կրկին գերագնահատում է երկրի այս ղեկավարի հաշվարկները: Եթե Հայաստանի կառավարիչը կտրված չլիներ իրականությունից, նա ուղղակի չէր ունենա Ամուլսարի թեմայով երկրորդ լայվը: Լայվ, որ ի ցույց դրեց երկրի կառավարչի՝ Ամուլսարի հարցում տարօրինակ անսասանությունն ու բացարձակ ինքնավստահությունը, ինչպես նաև՝ ժողովրդի ցանկության անարգումը:

Բացառված չէ, որ վարչապետը կդիմի ուժային լուծման: Նման ելույթ ունեցողն ուժ կիրառելու հրաման նույնպես կարող է տալ: Սարի պահապաններին ուղղված ուղերձը հնչեց որպես խնդրանք, բայց իրականում սպառնալիք էր դա: Թե ինչ կլինի դրանից հետո՝ այլևս դժվար է կռահել: Քանի որ սա քաղաքականություն և պատմություն չիմացող իշխանություն է, այն չգիտի, որ նման հանրային սուր թեմաները սովորաբար միտում ունեն իրենց ընտրազանգվածն իրենց թշնամի դարձնելու և մինչդեռ բողոքի ալիքն սկսում է առանձնացված թեմաներով՝ ճնշման փորձերի դեպքում այն արագ վերաճում է իշխանության հրաժարականի պահանջի:

Կարծում եմ՝ հեռու չէ այն պահը, երբ իշխանության երեկվա Ռուբիկոնն անցնելուց հետո այդ Ռուբիկոնը կանցնի և ժողովուրդը»: