«Էրդողանի վարչակարգը պատրաստվում է «Լիբիայի ազգային բանակի» հրամանատարի դեմ ճակատամարտին». Վ. Ոսկանյան

Իրանագետ Վարդան Ոսկանյանը ֆեյսբուքյան իր էջում գրել է. «Էրդողանի վարչակարգը փաստացիորեն պատրաստվում է մայրաքաղաք Տրիպոլիի համար «Լիբիայի ազգային բանակի» հրամանատար Խալիֆա Հաֆթարի դեմ ճակատամարտին, սակայն, ամենայն հավանականությամբ, չունենալով անհրաժեշտ քանակով արբանյակ զինյալներ, ստիպված է Լիբիա տեղափոխել սիրիական Իդլիբում գործող ծայրահեղական գրոհայինների խմբեր, ինչը հնարավորություն է տալիս սիրիական բանակին լուրջ հաջողություններ գրանցել այս ուղղությամբ։

Նվաստիս համակրանքը Լիբիայում, բնականաբար, ֆելդմարշալ Խալիֆա Հաֆթարի կողմն է, որի հակաթուրքական քաղաքականության մասին, ի դեպ, հայալեզու տիրույթում 2014թ․ կարծես թե առաջինն եմ գրել, իսկ երազանքս է, որ օրերից մի օր կկարողանանք որպես պետություն սերտ կապեր հաստատել և ըստ նպատակահարմարության աջակցել հակաթուրքական ուժերին ողջ Մերձավոր Արևելքով մեկ՝ տարբեր խորհրդարաններում հայերիս ցեղասպանությունը ճանաչող բանաձևերի համար դռներ մաշելու փոխարեն»։