Երեքշաբթի, 19 մարտի, 2024 թ.
|
Ստեփանակերտում`   +5 °C

«Երկրի առաջին դեմքերի պետգնումները պետք է բացել հասարակության առաջ». Աշոտ Մելիքյան

«Երկրի առաջին դեմքերի պետգնումները պետք է բացել հասարակության առաջ». Աշոտ Մելիքյան
373
Ուրբաթ, 21 փետրվարի, 2020 թ., 14:15

Փետրվարի 21-ին «Պետական գնումների համակարգի հիմնախնդիրները և դրանց լուծման ուղիները» թեմայով խորհրդարանական ունկնդրումների ժամանակ Խոսքի ազատության պաշտպանության կոմիտեի նախագահ Աշոտ Մելիքյանը հայտարարեց, որ հեղափոխությունից հետո պետք է կրկին արդիականացնել և քննարկման դաշտ բերել երկրի 3 գլխավոր պաշտոնկաների՝ ՀՀ վարչապետի, նախագահի, ԱԺ նախագահի ծախսերի թափանցիկության ու հաշվետվողականության հարցը: Խնդիրն այն է, որ մինչ հեղափոխությունը «Գնումների մասին» օրենքով ամրագրված է եղել, որ ՀՀ վարչապետի, նախագահի ու ԱԺ նախագահի ծախսերը դասվում են պետական գաղտնիքի շարքին: Այն ժամանակ իրենք հարցադրել են, թե կոռուպցիայի դեմ պայքարը, հաշվետվողականությունը հասարակության առջև վերաբերում է բոլոր պաշտոնյաներին, բացի նշյալ 3 պաշտոնատար անձանցի՞ց: Նախկին իշխանությունը բնականաբար չի անսացել խոսքին, և նշյալ պաշտոնյաների ծախսերն օրենքով դուրս են մնացել հասարակական վերահսկողությունից:

ԽԱՊԿ-ի նախագահը նշեց, որ հեղափոխությունից հետո այս դրույթը վերանայող օրինագիծ են մշակել, որն ԱԺ-ում շրջանառության մեջ էր դրել ԼՀԿ խմբակցությունը: Թեպետ նախագիծը վերջնականապես մի կողմ չի դրվել, սակայն ընթացք էլ չի տրվել դրան:

«Հետհեղափոխական Հայաստանում ամոթ է նման տիպի սահմանափակում մտցնել տեղեկատվության ազատության առումով, ամոթ է այդպիսի սահմանափակումներ ունենալ կոռուպցիայի և հաշվետվողականության տեսանկյուններից: Երկրի 3 առաջին դեմքերի պետական գնումները պետք է բացել հասարակության առաջ՝ հաշվի առնելով անվտանգության խնդիրները»,- հայտարարեց Ա. Մելիքյանը:

Նա նկատեց, որ նման օրենսդրական նախաձեռնությամբ է հանդես եկել «Իմ քայլից» պատգամավոր Սիսակ Գաբրիելյանը, սակայն կարծես նախագիծը մնացել է գզրոցներում: Ս. Գաբրիելյանի փոխարեն արձագանքեց Արտակ Մանուկյանը: Նա խոստացավ, որ շուտով հանրությունը կտեսնի, որ օրինագիծը գզրոցներում չէ: