«Վարչական ռեսուրս օգտագործելու փորձ անենք, պարտվելու ենք»․ Նիկոլ Փաշինյանի արձագանքը «Հետք»-ի հրապարակմանը

ՀՀ վարչապետ Նիկոլ Փաշինյանն Ազգային ժողովի նիստում արձագանքեց «Հետք» առցանց լրատվական կայքի վիճահարույց հրապարակմանը, որով տեղեկատվություն էր հրապարակել «Քաղաքացիական պայմանագիր» խմբակցության փակ խմբից։

«Որ ընտրություններում մենք, ուզելով թե չուզելով, անուղղակի կամ ուղղակի, վարչական ռեսուրս օգտագործելու փորձ անենք, այդ ընտրություններում պարտվելու ենք։ Համոզված եմ դրանում։ Ընդհանրապես տարօրինակ է, որ մենք այս թեման կարող ենք քննարկել։ Մենք վարչական ռեսուրս կիրառելո՞վ ենք հեղափոխություն արել»,- նշեց Փաշինյանը։

Նա հավելեց, որ իշխող խմբակցությանը անընդհատ մեղադրում են որոշակի քաղաքական տեխնոլոգիաներ կիրառելու մեջ և ընդգծեց․ «Մեր քաղաքական տեխնոլոգիան էմոցիան է, ժողովրդի հետ օրգանական կապը և սերը ժողովրդի և երկրի նկատմամբ, ի՞նչ տեխնոլոգիա»։