Թուրքիան լրացուցիչ զորք է ուղարկել Սիրիա․ Պուտինն ու Էրդողանը քննարկել են իրավիճակն Իդլիբում

Թուրքական բանակը զրահատեխնիկա է ուղարկել Սիրիայի Իդլիբ նահանգ, հաղորդել է Sabah-ը:
Հրապարակման համաձայն, շարասյուներում երևում են հատուկ նշանակության զորքեր և հրետանային ստորաբաժանումների ծառայողներ:
Բացի այդ, հաղորդվում է, որ երկու F-16 կործանիչ և մեկ անօդաչու թռչող սարք են դուրս եկել թուրքական Ինջիրլիք ավիաբազայից: Վայրէջք է կատարել ուղղաթիռ և հատուկ նշանակության ինքնաթիռ:

Այսօր Ռուսաստանի ու Թուրքիայի նախագահներ Վլադիմիր Պուտինը և Թայիփ Էրդողանը հեռախոսազրույց են ունեցել, որի ընթացքում քննարկել են Իդլիբի դեէսկալացիոն գոտու վերաբերյալ համաձայնագրերի իրականացումը, հայտնում է Կրեմլի մամուլի ծառայությունը:
«Երկու կողմերն ընդգծել են Սիրիայի հյուսիս-արևմուտքում իրավիճակը կարգավորելու համար լրացուցիչ միջոցառումների անհրաժեշտությունը»,- ասվում է հայտարարության մեջ:

Կրեմլն ընդգծում է, որ «պայմանավորվածություն է ձեռք բերվել ակտիվացնել միջգերատեսչական խորհրդատվությունները և մշակել մոտ ապագայում հանդիպում անցկացնելու հնարավորությունը»: