«Ֆրանսիայի դեսպանի խոսքերի շուրջ աղմուկն արհեստածին է»․ Հայկ Մարտիրոսյան

Քաղաքագետ Հայկ Մարտիրոսյանը ֆեյսբուքյան իր էջում գրել է. «Ֆրանսիայի դեսպանի խոսքերի շուրջ աղմուկն արհեստածին է: Դեսպանը կոչ է արել իր համաքաղաքացուն՝ վերադառնալ Ֆրանսիա: Եվ եթե ոմանք վիրավորվել են նրա պատասխանից՝ ապա ավելի մեծ դեմագոգիա դժվար է պատկերացնել:

Արդյո՞ք դեսպանը հրապարակել է մի լուսանկար, որ կեղծ է: Ո´չ: Արդյո՞ք դեսպանը նրբորեն ակնարկել է, որ Նորքի հիվանդանոցն է լավագույն օգնությունը, որ կարող է Ֆրանսիայի քաղաքացին ակնկալել Հայաստանում և որ այդ լավագույն օգնությունը բարձր ստանդարտների չի համապատասխանում: Գուցե: Գուցե և ոչ: Բայց եթե անգամ այդտեղ ակնարկ կա՝ ի՞նչ սխալ բան կա այդ ակնարկում: Դեսպանը ցանկանում է, որ իր քաղաքացին վերադառնա Ֆրանսիա: Նախ՝ դա իր՝ որպես դեսպանի, պարտականությունն է: Եվ հետո՝ բոլորս գիտենք, որ ո´չ Նորքի հիվանդանոցը և ո´չ որևէ այլ Հ
հայաստանյան հիվանդանոց դժվար թե կարողանա ծայրահեղ իրավիճակում ծանր հիվանդներին ավելի օգտակար լինել՝ ինչպես որևէ ֆրանսիական հոսպիտալ:

Իսկական հայրենասիրությունը կեղծ պատրիոտիզմից՝ առերևույթ մի բարակ գիծ է բաժանում:

Սեփական իշխանություններին հեքիաթների և անլրջության համար մեղադրելու փոխարեն՝ այլ՝ բարեկամ երկրի ներկայացուցչին են պարսավում: Անտեղի և միայն նրա համար, որ նախ իր գործն է անում և հետո՝ գուցե ակնարկում է ճշմարտության մասին:

Սթափվի´ր Հայաստան»: