«Առօրյա կյանքն ավելի վտանգված է վարակվելու առումով, քան՝ ընտրությունները». Արայիկ Հարությունյան

Այսօր Արցախի Հանրային հեռուստաընկերությունում հեռուստաբանավեճի ժամանակ Արցախի նախագահի թեկնածու Արայիկ Հարությունյանն, անդրադառնալով համավարակի պարագայում ընտրությունների երկրորդ փուլը անցկացնելու մտահոգություններին, ասել է. «Ընտրություններն ամենաքիչ ռիսկն են պարունակում: Մեր առօրյա շփումները, առօրյա կյանքն ավելի վտանգված է վարակվելու առումով, քան՝ ընտրությունները, որտեղ պահպանվում են կանոնները: Իհարկե, դա քաղաքացիների ընտրելու իրավունքն է, բայց կոչ եմ անում ռիսկի տակ չդնել տարեցների և առողջական խնդիրներ ունեցողների առողջությունը»:

Հարությունյանը եթերի ընթացքում հայտնել է, որ ապրիլի 14-ին կայանալիք ընտրությունների 2-րդ փուլն անհրաժեշտ է, քանի որ կարիք կա ձևավորել լեգիտիմ իշխանություն՝ սպասվող ճգնաժամին դիմակայելու համար։

Նախագահի թեկնածու Մասիս Մայլիլյանը հրաժարվել էր մասնակցել այսօրվա հեռուստաբանավեճին։ Նա կոչ էր արել համավարակի պայմաններում չմասնակցել ընտրություններին։