«Հանձնաժողովը չի շարժվում սրա-նրա գրգռվածության աստիճանը հաշվի առնելով». Անդրանիկ Քոչարյան

Ապրիլյան քննիչ հանձնաժողովի նախագահ Անդրանիկ Քոչարյանն, այսօր «Ազատություն» ռ/կ-ի եթերում պատասխանելով հարցին, թե հնարավոր չէ՞ր ՀՀ 3-րդ նախագահ Սերժ Սարգսյանին հանձնաժողով կանչել արտակարգ դրությունից հետո, ասել է. «Չէինք կարող, որովհետև մենք սահմանափակ ժամանակ ունենք: Մեր մանդատը որոշակի ժամանակի համար է նախատեսված: Մենք 2-րդ անգամ խնդրեցինք ԱԺ-ին, հիմնավորեցինք դա, ներկայացրինք 6 ամսվա մեր կատարած աշխատանքը և ԱԺ-ն ընդառաջեց մեզ և ևս 6 ամիս երկարեցրեց մեր աշխատանքները»:

Անդրադառանալով ՀՀ առաջին նախագահ Լևոն Տեր-Պետրոսյանի հոդվածին, որտեղ նա գրել էր, որ անհրաժեշտ է սառեցնել քննիչ հանձնաժողովի աշխատանքները, որովհետև «այն ավելորդ գրգռություն է առաջացնում երկրի՝ առանց այդ էլ գերլարված մթնոլորտում», Քոչարյանն ասել է. «Հանձնաժողովը չի շարժվում սրա-նրա գրգռվածության աստիճանը հաշվի առնելով, առավել ևս՝ նախագահի նշած այդ ուժերը միշտ էլ գրգռված վիճակում են իշխանությունը կորցնելուց հետո, և մենք չպետք է հաշվի առնենք: Հարցերը պետք է ստանան լուծումներ և ոչ թե տրվեն գնահատականներ՝ լարված, գերլարված և այլն: Եթե այդպես նայենք, մեր երկրում մենք պետք է ոչ մի բան չանենք»: