«Նիկոլ Փաշինյանն արդեն իրեն անքննելի է զգում». Ավետիք Իշխանյան

«Հայաստանի Հելսինկյան կոմիտե» ՀԿ նախագահ, իրավապաշտպան Ավետիք Իշխանյանը ֆեյսբուքյան իր էջում գրել է. «Բակլան իմն է, խաշած եմ ցանում:

Անկեղծ ասած, աշխատում եմ չլսել ԱԺ քննարկումները, ԱԺ ընդդիմադիր ուժերի, հաճախ իսկապես իրավացի քննադատություններն ու առաջարկությունները։ Միևնույն է, ավելի քան 70% ունեցող քաղաքական ուժը ցանկացած երկրում կարհամարհեր բոլորին և կգործեր ըստ իր քաղաքական շահերի։ Այլ հարց է, թե հնարավո՞ր է, արդյոք, որ իրական քաղաքակիրթ երկրում, որևէ քաղաքական ուժ ունենա 70%-անոց վստահություն։ Համոզված եղեք, որ ոչ։ Ի վերջո, որքան էլ դժգոհեն, քննադատեն թե՛ ԱԺ ընդդիմադիր, թե՛ արտախորհրդարանական քաղաքական ուժերը, թե՛ հասարակական գործիչները, թե՛ արդեն խելքի եկած «ժողովրդի» ներկայացուցիչները, միևնույն է, ինչպես ասում են՝ «գնացքն արդեն գնացել է» 2018թ․ դեկտեմբերի 9-ի խորհրդարանական ընտրությունների արդյունքներով։ Այդ օրվանից սկսած․ իմքայլականներն, ավելի ճիշտ՝ Նիկոլ Փաշինյանն արդեն իրեն անքննելի է զգում և վարվում «Բակլան իմն է ՝ խաշած եմ ցանում» առածի սկզբունքով։
Հարց․ Ո՞վ է մեղավոր։
Պատասխան․ Փրկիչ փնտրող և «փրկիչին» ավելի քան 70% վստահության քվե տվող, ներեցեք, հիմնականում՝ ամբոխը»: